USA ah nupi, nulepa lak ning: Citizen le green card ai dannak

US citizen nih nulepa, nupi, unau le fale lak khawh a si. Nulepa, nupi le kum 21 tang fale ‘nupi or pasal ngei rih lomi’ auh duh ahcun visa number limit a um lo caah a rang deuh, a fawi deuh fawn. Kum khat hrawng lawng a rau. Nain, citizen si ko zong ah kum 21 a tling cangmi fale le unau lak duh ahcun a har deuh, visa number limit a um caah kum tam nawn visa number hngah a si.

Citizen nih auh khawhmi: (1)Nupi or pasal (2)nulepa (3)fale (4) unau Green card a ngeimi ‘lawful permanent resident’ caah nupi le fale ‘nupi pasal ngei rih lomi lawng’ auh khawh a si. Nulepa auh khawh asi lo. Visa number limit a um fawn caah kum tam nawn hngah a hau. Nupi nih a hngah kho ti lo caah pa dang a dawi takmi zong an um len cang.

Green card holder nih auh khawhmi: (1)Nupi or pasal (2) Fale ‘nupi pasal ngei rihlomi’

Auh ning: Nupi or pasal, nulepa or fale auh duh ahcun US ummi auhtu nih Form I-130 phit in USCIS ‘U.S. Citizenship and Immigration Services’ zung ah a herhmi document he petition sawk a hau. USCIS nih na auhmi minung he nan i pehlaih ning relationship le cawm khotu na si le si lo an zohfel cikcek lai i approve an tuah hnu ah Yangon US Embassy ah visa sawk khawh a si lai.

Approve tuah tiang hi thla 6 hrawng a rau. USCIS nih auhnak petition approve an tuah hnu in US citizen nih auhmi hna cu visa sawknak lam an pehzulh colh kho, aruang cu visa number limit a um lo. Nain, green card ngeimi nih auhmi hna caah cun approve tuah hnu zong ah caan saupi visa number hngah rih a hau, visa number limit a um caah.

Hiti ning in lakmi nulepa or nupi cu US ah a zungzal in umnak nawl le riantuannak nawl an ngah. Nain, caan sau nawn hngah a si caah lungsau ngai cu a hau. Auh duh ahcun US ah immigration lawyer ‘sihni’ i hlan ah a tha bik. Caan pek ngai a hau caah zaran hawikom nih an in bawmh kho lai lo.

Note: Visit visa ‘non-immigrant’ le immigrant visa ‘zungzal caah auhmi’ ai dang. Visit visa cu auhnak ‘calling letter’ hmanh a hau lo, ho poah nih direct in sawk khawh a si. Sawk ning US cozah website ah tling tein rel khawh a si. Credit: Salai Lungthli Tum