Thantlang kan party candidate kongkau–tawite! Miphun party le kan miphun ramkhel nan dawt ruangah Thantlang kan candidate cuh timh/lo kong (keimah kong tel in) zatlang media ah a phunphun in ruahnak nan kan cheuhmi cungah kan I lawm ti kha a hmasa bik ah chim ka duh.

Amahbelte, cheukhat nih nan kan ruahdomh ning belte hi purhdah sawhsawh deuh an si. Nan kan ruahning bantuk in kan party chungah buaibainak faktuk a um lo hih. Candidate hmun icuh timi cu khoika party poh ah aa cuhduhtu minung pakhat nak tam um tawn cio asi ko i cucu buaibai le cuhkalh tiah a chiatnak zawng in ruah ding a si lo. Primary Election ti a si. Party phungning tein a kal ding kha biapi si ko i —a kal cuahmah ko.

Party Central (CEC) nih pengkip CE kha “candidate cuh a duhmi mizeipoh nih, khoika hmun poh soknak nawl cu January ni 20, 2020 thawk in inka a awnter i cucu June ni 27 tiang khi khi awn a si. Cun July ni 11 khi ahnu bik chia in Pengkip CE nih candidate an thimmi cazin kha Central (CEC) ah chuahpi a si lai i cucun Party surlupi(HQ) nih official in fehternak le thanhnak a tuah te ding khi asi–July thla dih hlan ah. Cucu Pengkip kan party EC sinah kan thanh dih pinah kan party official FB Page (atangah zoh) le Local Media ah zapi theih in thanhmi a si ko. Chinworld timi hmeh piak law kawlca in rel khawh a si lai.

Keimah kong zong, cu party phung ning tein ka sok duhnak hmun ah, atu hi a voi 2nak ca ka chiah cang ko i Party nih a tha bik in an ka ceihpiak te ko lai. Keimah duhnak hmun thengtheng ka ti lo. Kum 14 chung ramkhelrian luphum in rian ka tuanve caah “ka duhnak” cu an ka ceih/theihpiak ve lai i cu hnu ah party mipi le Committee nih “a tha bik in” party phungning tein an ka ceihkhan piak te ko lai I cucu keimah tel in ahopoh nih kan cohlan te ko lai.

“Ka duhnak thengtheng” timi a um hrimhrim lo. Keimah MP cuh le cuh lo kha party caah le miphun caah number one a si hrimhrim lo. Party le miphun a ngandam i dingfel tein le phungning tein kan kal khawh ding kha a biapimi a si ko.

Cucaah “nan buai” tiah cheukhat nih nan kan timi hi kan buai hrimhrim lo  Keimah pumpak zong ka buai hrimhrim LO. Buai awk hrim a um lo. Ceihkhan liomi a si. Ceihkhan dih hnu zongah a tha bik a si te ko lai i buai awk hrim a um lailo. Pathian nih kan party akan umpi ko.

Tuandeuh ahcun, party chungah a fiang rih lomi thil a si caah media/zapi sinah zeihmanh thanhnak le fianternak ca tial lo dingin ka tuanhawi le nih an ruahnak an ka pek—a buaithlak chin sual lai an ti— asinain thilsining ka zoh tikah tlawmpal cu fianter a hau ko rua ka ti caah a si. A tikcu caan chuah tikah a tha bikmi thawngpang mipi sinah thanh khawh kan izuam te ko lai caah hi kong hi cu kan party chung ceih dingah kan chiahpiak ko uhlaw, hivial in za ko sehlaw tiah kan nawl fawn hna.

Party le miphun nan dawt ruangah nan caan le thazang tampi chuah in nan ceihpimi le nan lungre nan kan theihpimi a si ko caah —-kan ilawm tuk ko ti chim buin-Salai Ceu Bik Thawng