“CHONDON VAAM” (By – B.H.Van@Lenfu) Khua hlan kan Lai inn chung ah cun, tappi lungthu le varlung kar ah khin vaam an chon mi a um. Cucu “Chondon vaam” tiah an rak ti. An tuahnak a chan cu, tappi lungthu le, mileng sakai he i lenkai Ie bia i ruah nak kha an chon, an dan khi a si. Varlung ah cun an fanule kha nupi ca dingah an hung lenkai hna tikah, an i chawnhkhenhnak, bia an i hrennak a si ca ah,”Varlungtlang bia” ti a um tawn. Cu an bia hren mi le biapipuam, bia thupnawk an i ceih mi kha, Tap pi lungthu i a tthu mi nih hmuh le theih lo nakding ah Chondon vaam cu an tuahnak a si.

Nihin chawlehthal rian ah kuva thei a zuar mi cheukhat nih thil tha lo, ritsiivai pawl kha motor tawne ah rawn in kuva thei kha motor khat in a cungah an ben i an khinh hnawh mi zong khi, chondon vaam ah an hman ve ti nak a si. Mi cheukhat nih, kan ram buai lioah CNA le CDF hi chondon vaam ah i chon zau in le ralzaam dirhmun ah dir ttungin ritsiivai, zu, raal hriamnam kha mah pumpak lawng paw khimnak caah a hmang mi zong um an si.

Atu bantuk chiip le cheep lio ah, Pathian Thawngtha bia kha chondon vaam ah hmang in a ho sawm le ruaih loin phungchim i a vakvai mi zong um a si ve. Micheu nih kan ram buai hi Chondon vaam ah hmang in, ram 2nk, le ram 3nk, ah kal le chuah khawhnak lam dap in, India le Malaysia cu vun fuhpanh luaimai kan hung si.

Kan pupa nih chondon vaam pin i varlung ah hin, chungkhar khuasak tintuknak, nu sual pakai kongkau, nupi pasal kong, inn le lo kong, i rempatnak kong chimnak ah an hman mi, nihin ahcun, thil pingpang tuahnak le ceihkhannak caan le hmun ah kan hman cangnak kan runinn chung cio ah hin, van le vawlei a sertu Bawipa he, kan i chawnhbiak nakding ah chondon vaam tu ser in, Amah he i hawikomhnak caan tu ser kho hna u sih law, Bawipa ai lawm deuh lai i kan ram a dam ter deuh lai. “Maw Chondon vaam, Chondon vaam…Aw!!!” Credit: The Hakha Post