SAC Nih Nawlngeihnak Thla 6 A Chap Ṭhan Lai! Min Aung Hlaing nih a voihnihnak nawlngeihnak cu thla 6 a chap ṭhan lainak kong cu SAC ralkap chimphuannak nawlngeitu Zaw Min Htun nih BBC ah a chim. Ram pumpi thimnak dingah daihnak a um khawh nakding ah le thil dangdang tuah a herh rih lai caah nawlngeihnak thla 6 kan chap ṭhan lai, tiah a chimchap.

July 31 ah SAC ralkap nih uknak an lak kum khat le cheu a tling lai i, kum khat a tlin hnu in thla 6 nawlngeihnak an chapnak a tlin ni zong a si lai. SAC nih 2021 Febuary 1 in uknak a lak i President cu an tlaih. Vice President Myint Shwe nih rampi thil poipang ton caan(emergency) a si tiah a thanh i, Min Aung Hlaing cu nawlngeihnak a rak pek.

2008 phunghrampi ning in rampi poipang ton caan lioah kum hnih tiang uk khawh a si. Sihmanhsehlaw SAC nih Kaalung auh in thla 6 nawlngeihnak a chap i, 2023 Febuary 1 ah kum hnih a tling lai. 2023 August thla ah rampi thimnak ka tuah lai i, teinak a hmumi political party cu nawlngeihnak kan pek lai, tiah SAC ralkap nih thawngpang fianternak an tuah lio ah an chim. Credit: The Chin Post

Thawngpang dang: Myinmu Ah SAC Ralkap Chungtel Citmi Motor Pakhat Bomb Puah A Ton Caah 4 An thi. Sagaing ramṭhen, Myinmu peng Kan Hpyia Za Yet pawng ah palik le Pyusawhti an i citmi motor pakhat cu PDF nih nihin July 30 zing sml 9:15 hrawng ah bomb an puahhnawh i SAC ralkap chungtel 4 an thi tiah Moe Nyo Revolution Force M.N.R.F nih cathanh an chuah.

Palik le Pyusawhti an i citmi motor cu Sagaing palik training sianginn ina chuakmi a si i, Moe Nyo Revolution Force M.N.R.F PENTAGRAM, People’s Guerillas Commando – Myinmu le PEOPLE REVOLUTION FORCE P.R.F hna nih bomb lung 10 in an puahhnawh hna caah Pyusawhti 4 an thi, tam ngai hliamhma an pu. PDF lei in a thimi le aa hliammi an um lo, tiah theih a si.