PM Benjamin Netanyahu Nih Israel Mipi Bia A Kamh Cang Hna: Tu Sept 17-ah hin Israel ram Knesset (Parliament) thimnak ngaih si lai i, campaign zong anmah le party cio ah biatak tein an ngaih lio hna si ve. Cu bantuk in PM Benjamin Netanyahu hruai mi Likud party hna zong hi anmah nih cozah an sertthan kho ti lai maw? timi a fiang lo.

Hi kongah nizan ah PM Netanyahu nih Ramat Gan’s, Kfar Maccabyah Hotek ah biachimnak ngaih in a timi cu kanmah nih cozah kan hruai tthan rih a si ahcun Jordan pawngkam (Jordan Valley) chung a um mi, “Judea le Samaria” ram hna cuIsrael ramah chiah a si lai,”tiah Map cun a langhter.

Tutan thimnak ah ka tlintthan ahcun Judea le Samaria ram hna hi Israel ramah ka umter lai. Kanmah bantuk in party dang Benny Gantz le Yair Lapid nih a hruai mi Blue and White hna nih cun hi bantuk in zeihmanh ruahmannak an ngei lo,”tiah mipi sinah cun a chim.

Hi kongah Saeb Erakat, PLO Gen Secy nih cun PM Netanyahu thil tuahmi cu soisel in, ralruknak a thawhter lai. Mah pa hi Remnak lam hrawkhraltu (chief destroyer of peace process) a si,”tiah PM Netanyahu cu a soisel colh ve.

PM Netanyahu biachim ning hi President Donald Trump-nih Middle East ah remnak a chuah khawhnak hnga Peace Plan bantuk in, mah thil hi a thuhnawh mi sinain Benjamin biachim ding mi hi White House ah an thanh hmasa dih cang tiin The Jerusalem Post nih cun a langhter.

PM Nstanyahu nih a chim rihmi cu, “Kfar Daba, Netanya le Tel Aviv hna hi Gaza ramri si ding in zeitik hmanh ah kan siang lai lo” tiin, US Defense Secy Mike Esper le Vice President Mike Pence hna cu thaizing zanah khin London ah hmuh a timhnak hna kong cu chim in phone ka chawnh cang hna,”tiah a chim fawn.

PM Netanyahu nih hin Gaza Strip i khumh dingin Judea ram le Samaria cu kan siang lo tiin chim ko hmanhsehlaw Palestinian hna le Arab ram hna nih Israel ramah zungzal in um thai ding cun an duh ve lo.

Dohtu party simi Blue and White le Democratic Union hna nih Likud party thil tuah ning le PM Benjamin Netanyahu biachim pawl cu media-ah langhter lo dingin Central Election Commision hruaitu, Supreme Court Judge Hanan Melcer sinah an nawlnak an tuah nain media lei nih an phozar tthiamtthiam ve.