Khah Nuam Bak Cang Lai Hih. Laipa Tthawng Tha Cung Lian A Pai Tthan Cang Lai. Zeidah Chim?

Khah tukum cu nuambak cang lai hih. Caan saupi a kan dinhtak mi kan Laipa tthawng Tha Cung Lian nih ka pai tthan cang lai”tiah a chim cang. Tha Cung Lian hi atu a ra laimi December ni 28. DC i tuah mi ah a tthan cang lai. Hi kongah amah Tha Cung Lian zong nih a tanglei bantukin a rak langhter cang.

Tha Cung Lian: Paih uartuk mi ka sinain thil tlamtlin lo ruangah caan tawi te ka din ve. Sihmanhsehlaw atu cu dan tein ka um si ahcun atu a ra laimi December ni 28. DC paih an tuah mi ah ka pai ve tthan lai. Laipa le paih! Nuam tak tein! Cucaah ho paih rat khawh rak i zuam ve te uh. Dam tein kan i tong te hna lai. Ka lawm. D.C paih tlangtla tu# Cakeeeee Ref: Tha Cung Lian

Tha Cung Lian nih a chim mi kongah Laipa tthawng Rung Lian Ceu zong nih a tanglei bantukin a chim ve. A timi cu Champion Tha Cung Lian zong a kir ve cang. Tukum kan Lai Paih cu a nuam lai hih”tiah lungtho taktak in a chim ve cang.

Relchih: Duhnak le Dawtnak An I Dannak Cu Zeidah A Si? ‘What Is the defference between Like and Love? Minung tampi nih hin duhnak le dawtnak a muru taktak an sullam hi kan i fian ‘kan thleidanthiam’ tawn hna lo tik ah rawhralnak a kan chuahpi tawn. Cu ti ka ti tik ah mirang in ‘love’ timi nihhin ‘dawtnak’ lawng sullam a langhtermi si thlu lo in ‘duh’ timi biafang zong hi kan Lai Dictionary nih a pekchih.

Asinain mirang nih duhnak timi biafang an hmanmi hi zoh ṭhan tik ah ‘like’ ti hi a si. Biana ah, duhnak timi cu ‘I like the way you act’ dawtnak ve cu ‘I love you more than anything’ tiin hman khawh an si. A fawinak in kan chim ahcun duhnak timi cu mit in hmuh khawhmi ‘outward appearance’ a si i dawtnak ve cu mit in hmuh khawh lomi ‘inner appearance’ kha a si.

Duhnak le Dawtnak an sullam an i dannak tete cu: Duhnak nih a sawh duhmi cu thil pakhatkhat na hmuhmi kha na hnatlakpi ‘agreeable’ or na lung a simi ‘satisfactory’ kha a si. Dawtnak nih a sawh duhmi tu cu thuk piin lungthin laaknak ‘deep attraction’ or nuva si duhnak ‘sexual love’ kha a si ve ‘caan khat hrang ca lawng siloin zungzal ca a chim duhnak mu’.

Duhnak Sullam cu Zeidah A Si? ‘what does like mean? Thil pakhatkhat kan hmuh tik ah kan hnatlakpi mi thil or kan lung a si ngaimi thil hna kha ka duh tuk tiah kan ti tawn. Tahchunhnak ah, pangpar ai dawh ngaimi na hmuh i na duh tukmi pangpar a si ca ah na ṭawh ko. Cu pangpar cu nangmah nih na ṭawh cang ca ah nangmah ta kha a si. Asinain ṭawh cangmi pangpar a si bantuk in caan rau lo ah a uai ‘ai dawhnak a par le a rim zong kha a ziam’ ṭhan tik ah hlawnh i a thar hawl ṭhan kha na duh.

Cu bantukin ngaknu tlangval kan duhnak hna a ruang cu: muidawh a si ruangah, mifim a si ruangah, mirum a si ruangah ‘physical appearance or qualities’ tbk in a ruang phunphun ruangah kan duh tawn hna. Cu bantuk dawtnak tel loin a ruang phunphun ruangah kan duhmi hna cu ai dawhnak a ziam tik ah, a fimank cu accident a ton sual ca ah ahlan bantuk a si ti lo tik ah, a chaw lehthal a tluan lo tik hna ahcun duhnak timi cu a ziam ṭhan ve tawn.

Cu tikah ngaknu tlangval or nuleva karlak ah i ṭhennak a chuah lengmang tawnnak hi a si. Kan Laimi tampi chung zong in a luancia kum hrawng ah ‘dawtnak’ ‘love’ tel lo bak in ‘duhnak’ ‘like’ mit in fale va ngeihter a tam ngaite. Cu ti dawtnak tel lo ṭhitumnak an tuah tik ah fale nih harsatnak a phunphun an tuar i a donghnak ahcun a kir ṭhanmi zong an um len ve.

Dawtnak Sullam cu Zeidah A Si? ‘what does love mean?’ Dawtnak ti sullam hi Greek nih cun Agape ‘Pathian dawtnak, Eros ‘ngaknu tlangval dawtnak, philia hawikom dawtnak’ le Storge ‘nulepa dawtnak’ tiin phunli in an ngeih. Azatein kan chim ahcun a tam tuk lai ca ah Eros lawng hi zohchunh in ka chim lai. Dawtnak kong hi cu keimah nakin a theihhngal lawngte nan si ko ca ah tlawmpal lawng a fian deuhnak in ka chim tuah lai.

Dawtnak cu duhnak bantuk in mi zeipoh khi va dawt ‘ngaknu tlangval kong ah mu’ thluahmah khawh a si lo. Chim duhmi cu ngaknu tlangval tampi chungah duhnak nih cun muidawh le mifim kha cu tampi a duh ko hna lai nain dawtnak tu nih cun pakhat thengte lawng hi lungthin umek in dawt khawh a si. Zeicahtiah dawtnak cu duhnak bantuk in a zuangzam lo i pakhat cungte ah khan thih tiang zumhawktlak tein a um zungzal.

Socrates nih duhnak le dawtnak kong a rak chimmi cu, “when you like a flower, you just pluck it. But when you love a flower, you water it daily” a rak ti. Asullam cu minu/mipa kan duh tik ah mi zei asihmanh theih hlan ah ngeih colh kan duh. Asinain dawtnak tu nih cun a sining dothlat hnu ah lungsau tein a dawtmi si ve kha ai zuam. Cu ti an pahnih karlak ah a fekmi dawtnak in hram an bunh hnu ahcun thihnak dah ti lo an i dawtnak a hmun zungzal.

Duhnak le Dawtnak Fianternak: Duhnak cu mi pakhatkhat a muidawh ruangah, mifim le mirum a si ruangah ka duh hna khi a si. Cucu pumsa in a hung lang i ri a ngeimi duhnak ‘physical appearance’ a si. Dawtnak cu mi pakhatkhat a tlamtlinlonak, a chambaunak kan theih ko buin kan va duh ṭhiammi khi dawtnak cu a si. Cucu lungthin kilne in a hung chuak i ri a ngei lomi dawtnak ‘unconditional’ a si.