Myanmar rampi buainak kong he pehtlai in ASEAN meeting auh dingah ramdang nih an tawlrelmi le tuahmi cu China zong nih a lungtlinpi ve cang i ASEAN meeting ah myanmar rampi buainak kong ceihhmaiṭinak an ngei hna lai.

Meeting cu atulio ASEAN chairman ṭuan liomi Brunei hruainak in tawlrelmi a si i Indonesia ramdang vuanci in a cohlanpi hnuah China zong nih myanmar rampi buainak kongah ASEAN meeting a um dingmi cu ‘a ṭha tuk’ tiah a chim ve.

Asinain, mipi nih kan iruahchanning le i zumhning cun a si lai lo i ASEAN phu chungah a telmi ‘ram’ pawl nih Myanmar an kah lai i an doh lai tinak a si hlei lo. Atu lio Myanmar mpi cu ramdang in Myanmar ram an kah lai lawng ngia in saduh a thatmi kan tampi i cu bantuk taitai cu siseh law 88 kum ram buainak lioah ramdang nih Myanmar cu a rak kah cang hnga.

Ikah le i dohchan a si ti lo i ramdang nih cun an si khawh tawkin Myanmar ralkap cu hremnak a pek hna lai. Cucu thil kal phung zong a si. Cu bantukin China zong nih ASEAN meeting a cohlanmi le a lungtlinpimi hleiah ‘Myanmar ralkap nih an tlaihmi hna minung vialte cu thlah dingin a duhnak’ kong a chim chih fawn.

Meeting ah cun myanmar rampi buainak zeitindah kan tawlrelning a si lai, mipi le ralkap karlak zeitindah remnak a um khawh lai timi le minung an tlaihmi hna pawl zeitindah an luat khawh lai ti le zeitindah ralkaap kan dohning le kan buaipi hna ning a si lai timi pawl caihhmaiṭinak an ngei lai.

ASEAN hlanah vawlei cung rampi nganbik 7 phu G7 zong nih Myanmar ramchung buainak kong caihhmaiṭinak an rak ngei cang nain, zeiti hleiin chim rel khawhmi an ngei ve lo nain, Myanmar ralkaap cu mipi lakah ralthuam hman lo dingin le an tlaihmi pawl thlah dingah hna seh tiin ram 7 nih lungtlinnak in Myanmar ralkaap ca an rak kuat tiah theih a si. Chirhchan: Reuter, South China Morning Post

Biakilh: Thawngpang leh palh sualmi a um cun, careltu mipi nih nan kan ruahthiamnak hnga kan in nawlpat duh hna.

_____

Copyright © Chin World News Evening