Khah! Mino Nih Theih Hrimhrim Ding Cu A Herh Taktak Mi Asi A Fiang Taktak Fawn

Chin Mino Hna Nih Politics Kong Kan Theih Lo Tuk Mi Hi Lungfim A Cu Cang: Salai Ram Tin Thei (Cungpi) hi kan Lai mino ahcun a catial mi siseh, a ruahnak, a thinlung hi a pical ngai mi kan nau pakhat a si. Mi tha a pek thiam ning zong zoh tikah kum a no tuk rih mi a si nain, thinlung a dam ter kho tu tang a dormi a si zia a lang ngaingai. Tutang ah zei tluk in dah Mino hna nih ramkhel kongah kan hngalhnak a tlom ning kong a tial mi hi cu ruah tikah ngaih a chiat hringhran. Hi bantuk abiapit tukmi ram sersiamnak kongah nihin mino thaizing hruaitu i ti ding cu atu a chim ning ahcun kan i kalh bak. Hi hi ho ruangah dah a si hnga ti hi i check ngai kan hau,kan thisen kan thluak thahri tiang Ramkhel kong kan theih kan duh khawhnak dingah hin alam kip in kan kawl a herh ngai ve ko cang ti hi a ka ruah ter ngai ve.

Cu caah Bawipa thawngin Laimi cu zumhnak leiin cun cat lo in kan i chim kan i cawn piak cang ko i, a cheu cu kan i bahat dih cang ti awk in a um cang, Cu bantuk zumhnak leiah kar kan hlan rual in Ramkhel kongah biatak tein kan mino hna a tummer kho tu ding hna nih fak taktak in tang kan lak pi hna sehlaw buhkhai sakhai bak in kan barh hna sehlaw cu ti tal in kan i rel deuh hnga maw ti thinlung a chuak. Cu lo ahcun cawnnak sang kan ngei lo he ramkhel kong ABC hmanh in a theih lo mi nih hin kan ram sersiam ding cu a hlat tuk ko lai. Kha Cungpi atialmi relmanh a si sual lai lo? Siaherh ngaiin atangah rel ve tuah..

CNF Defence and Security Secretary asimi Col. Solomon Thangding nih “ Sianginnn kai lio, nolio ah Politics ah itel uh, mahbantuk i aa tellomi cu an hmailei lam a mui” tiin TCP nih interview an tuahnak ah a chim. Cucu ka hun uar kho taktak.

Atulio kan miphun dohthlennak/ramkhel, biaknak le zatlang leiin a kan hruaitu hna hi Sianghleiruun an rak kai lio i a cawlcangmi lawngte an si hna. Kan miphun pacan dirhmun in a kan dirpiakmi an si hna. An no lio ah hibantuk ah a rak iteltummi, a rak cawlcangmi hna cu hawihlei in an mit a dei deuh i an rian zong hlawh a tling khun tihi hmuh khawhmi asi.

Naite ah Dr. Hla Aung le Salai Cungcin te hruaimi GCCF hohaknak in Kalay Sianghleiruun Sianghngakchia hna caah cawnpiaknak tha taktak an tuah. Ramkhel le Peace Process ah biatak in a cawlcangmi Salai Za Ceu Lian, Kan miphun ah Business leiin hmaisuang asimi Pu Sui Hingz le Miphunpi dohthlennak ah kum 31 leng a sining dihlak aa hmangmi le Cozah he aa chawn cuahmahmi Col. Solomon Thangding hna cu cawnpiaktu ah an sawm hna. Cawnpiaknak ah aa telmi Sianghngakchia pawl hmanthlak an hun tar tik ah ka ruahning khan in an itel hna lo, ka lungsia a remlo ngaingai. Pengtlang pakhat sianghngakchia milu khan lawng an si. Ramdang ah hibantuk cawnpiaknak va kai duh ahcun luhnak ticket a tlawmbik $50 an kan hauh i kan kai kho tawn lo. A lakte in sawmpiak, chuncaw dangh tiang hna i tuahmi ahcun, maw vanlaw tiin vai tel luaimai ding khi asi.

Ramkip, Kawlmi le Tlangcungmi hruaitu tampi hna hi mino an rak si lio ah hibantuk ah a rak iteltummi deuh an si hna cu kan theih dih ciomi asi ko. 2018 thawk ah Laitlang i Mino le Sianghngakchia tonpumhnak tamlak te ah ka va kal kho. Cu i mino tampi ka hal hna i ka hmuh khawhmi cu Rampi Thimnak (election) ah thimfung a thla lomi an rak tam taktak. Mino nih politics teltumnak a tlawm zia a lang ngaingai. Dohthlennak lebang ahcun chim awk a umlo.

Kan miphun mino hna le sianghngakchia hna nih miphun kongkau le thanchonak kong cawnpiaknak tete tuahmi ah hinak fak deuh in teltum le thazaang kan chuah deuh ngaingai a hau. “Nationalism” kan khel cuahmahmi hi kan mino hna sinah hramthlak lawngah kan saduhthah a tling lai i, miphun ah kan him lai. Credit: Ram Tin Thei

Note: Hmanthlak hi kanmah nih aa remcan ningin  kan chiahmi si caah a ruahzia kan thiam uh!