By zasang Cinzah: Hawi le hna Min Aung Hlaing cu thih lai ke cheih in aa cheih cang. Zei tuah awk theih loin cawl chia in a cawl lio a si. A hmanthlak hrim kha zoh ulaw a thlarau nih a chuak tak cang. Nihin thawk in US nih UN Security Council ah President an ttuan. “President kan ttuan chung ah Kawlram kong hi biapi in kan ceih lai” tiah UN ah US ambassador Linda nih nihin press conference ah a chim.

Bochanmi kan pale hna nih “UN le US tbk i bochan hlah u, Ralkap zong an thlah lai lo” tiah nan ti pengmi hi dik deuh rua lo e. Hitin nan chim tikah ram chung lei caah thazaang dernak a si lehlam sual hnga maw, timi ka phang ngai. Minung kan nunnak ahhin “HOPE” hi minung tampi caah thazaang le teinak a si zungzal.

Vawlei cung politics hi a ho hmanh nih predict khawh a si lo. 22222 uprising hna hi kan mang hmanh ah kan mangh lomi kan ton cuahmah ko. Cucaah vawlei cung politics hi kan ruah lo ning pi in a cang khomi lawngte a si ko. Cun UN phunghrampi, Chapter VII hrim ah Kawlram bantuk buainak ahhin UN Ralkap i thlak khawhnak fiangte in an ttial ko caah, UN zong nih an kan zuan hnawh khawhmi a si ko. Cucaah HOPE ngei kha a sualnak a um hrim lo.

Cucaah, ram chung lei Mino hna, bawmtu kan ngei lo tiah nan tha chia hrim hlah seh. Cawl u. Idea thatha chuah u. Vawleipi hi kan hnulei in an dir ko u ti kha rak hngalh peng ko u. Kan pale tampi nih Vawlei hmun kip le ram kip ah an cawlcang cio ko. SEAN an si ah UN an si ah EU le US tbk zong hi hlan bantuk an si lo. Cawl khawh nak paoh in an cawl ko. US president Joe Biden zong hi zei huaha a si lai lo ti hlah u. A herh ahcun President a tuannak in thla chung ah Syria ah ralhrang a phawmh colh ve ko.

US politics tuanbia hrim ah Republican nih terrorism le National Security lei an focus lio ah Democratic Party hi Vawlei cung Democracy dirhkamhnak hi an focus zungzal ve. Cucaah Myanmar Democracy nunnak tthannak ahhin an daithlang hrim lai lo tiah hnabei sei ko hna usih. Cattialtu: By Zasang Cinzah