Tuni cu Yangon ah minung thazaang zong biatak tein a hun thawng tthan. Sule ahcun Min Aung Hlaing a huatu an khat ko, an tam taktak. Hledan, Minigone le Hledan ah tam taktak an um rih. Zinglei kha lam an khar dih caah lam zawhnak hmun phak kho loin a kirmi zong an tam lam phih um hlah sehlaw lam zawhtu a let an tam chin lai.

Bank vialte an hon kho ti hna lo, cozah zung kaimi an tlawm caah tluang tein rian an tuan kho ti lo. Tlanglawng cu aa din beh cang. Ralkap cozah dohtu kan thawng chin. Min Aung Hlaing cu a lungmit pah cang ko lai. By Salai Lungthli Tum

Relchih: Myanmar’s State Counselor Daw Aung San Suu Kyi cu nihin ah Ralkap lei nih case an chap piak, tutan case an chap piak mi cu Covid phungbuar nak pohma a si i kumthum thongtlak khawhnak pohmah a si. A hmasa case an ser piak mi kha kumthumthongtlak khawhnak a si fawn, cu caah a pahnih in sual an phawt sual ahcun kumruk chung thonginn chung ah a taang ding dirhmun ah rap an tarh piak diam hoi.

Ralkap nih Aung San Suu Kyi cu Export le Import Law in taza an cuai, a sual ko tiah hramhram degree an chiah piak ahcun kumthum chung thonginn ah hrennak ding lam asi. Cun nihin ah khan Video Conference in biaceihnak an tuah hna i cu ahcun Ralkap lei nih a sualnak case thar pakhat an ser piak tthan, cucu Covid phung a buar timi a si.

Aung San Suu Kyi le President Win Myint cu February 1/2021 zing ah Ralkap nih an umnak ah an va tlaih hna, cun nihin tiang an mah Ralkap hrennak taang ah an um. Cu hnu ah President Win Myint cu Covid phung a buar tiah taza an cuai, cun Daw Aung San Suu Kyi zong a inn ah Radio le Hand phone an hmuh caah Export le Import law in taza an cuai ve.

Nihin ah an pahnih tein biaceih zung ah Video in biahalnak an ngeih hna, cu ahcun Daw Aung San Suu Kyi cu case thar an serpiak chap i kumruk chung thongtlak khawhnak lam an kawl hi asi. Note: Irrawaddy News ah fiang tein a tial mi asi, a tawinak le a fiannak bik in kan rak leh mi asi. Ref: L.K.J