Esther a ttenhtuk ruangah Biakinn chung tiangah miphun kongah thawngthannak he a au khuangtu pitar pakhat cu a lar taktak. A ttenhnak men le miphun a dirkamhnak kongah cun mawchiat ding um lo nain Benjamin Sum kongah ralttha tukin a chim mi belte ai dawh lo tuk.

Benjamin Sum caah mi zeihmanh nih Bike i cit le a vakmi an um lo. Hlasak a thiam ti tu, amah aw duhtu, a nuncan duhtu le ai phundang bik ti tu hna nih thaazaang pekin an vote mi si ko. Miphun sinak in Esther nan dirkamh asi zongah minung pahnih lawng an si lo i, minung 5 an um rih, Zei ruangah dah Benjamin Sum konglam cu mipi sinah thawngthanhnak bantukin na chim rel?

Kapi Falam nih cun Biakinn chung tiangah thanhnak tuah in minung pakhat ah fang 5 an kholh timi thawng hi US, Kalay le Falam khuapi ah an tuah timi thawng kan thei lo. Ralttha tukin zei ruangah dah Biakinn chung tiangah thawngthanhnak tiang tuah in na chim?

Kapi Falam khua chungah bike he vak in phaisa an kholh na timi hrim hi kanmah Falam hmanh nih Falam khua chungah Benjamin Sum caah tiin phaisa an kholh timi hna thei lai lo, Bike zongin hohmanh an vak lo i, phaisa zong an kholh lo. Na duh cun Esther caah phaisa kholh ding le thaa pek ding cun na aupi khawh ko, sinain Falam kongah asi lo ning in thawngthanh le phuahcop in chim rel a herh lo. Kawl le Karen zong an um i, pakhat le pakhat i dohnak si loin hlasak thiam zuamnak asi.

Benjamin Sum caah tiin thisen tiang an hlutmi thawng kha na thei kolo maw? Kanmah Falam mi si loin miphun dang pawl nih Benjamin Sum caah thisen an pek khah. Benjamin Sum caah Singapore in Guiter ttha le dawh taktak an rak kuat mi thawng hna na thei ko lo maw? Kanmah Falam mi si loin Singapore um Zomi nungak pawl an si khah.

Sizung i Benjamin Sum caah rawl an semmi zong kha an thiltuah ttha ti loin hnahchuah hmuh in maw na rak hmuh? We Love hruaitu hna tuah mi si, kanmah Falam tuahmi si lo. Tahan le Kalay i Benjamin Sum caah vote peknak an tuahmi zong kha na rak hmu kho lo maw? Mutel company nih an tuah i, Chin hlasak thiam pawl nih an bomh hna i si ko.

Zuamnak i hla an sak hlan le sak hnu ah Benjamin Sum hmuh duh ah mipi au thawng vialte hna khi kanmah Chinmi an si lo, Myanmar ramchung miphun dang lawngte an si hna. Benjamin Sum ruangah an rian an i din hna i, Benjamin Sum ruangah an caan sunglawi an pek cio hna.

Benjamin Sum caah kanmah Falam cu zeihmanh kan si lo, Unau Hakha, Tedim, Mizo, Karen, Kachin, Kawl le mirang hna pinah midang dang hna cu vote petu an si hna. Miphun hoih le Biaknak hoih in si loin Benjamin Sum aw an le cawlcanghnak an duh ruang le hlasak a thiam an ti ruangah vote an pek i si ko. Nangmah nih na ttenhmi le thaazaang pek dingah midang sinah thawngthanh le chimrelnak tuah a herh lo. Holh ttha lo cu kan ttenhmi hna sinah a tla timi theih ah a ttha. Atu na biachim mi hi Esther nih a tuar lai timi phan a um ko.

Note: Falam nih kan pi biachim mi kongah lehnak an tuahmi si. Falam ca in an ttial i, Laica in kan leh chinmi a si. Laknak: Vapaulauaw