Khah! Joe Biden Zong President A Tuan Nikhat Bakin Impeachment Tuah Colh Dingin An Bawh Cang

World News

Nikhat a ttuan thawk in Joe Biden zong Impeachment tuah an timh colh: Georgia State aiawh in Republican Representative caah thimthar mi Marjorie Taylor Greene nih cun President Elect Joe Biden president a ttuan nikhatnak January 21, 2021 ah Impeachment tuah dingah House ah ka chuahpi colh lai tiah tuchun ah a chim.

Marjorie Taylor Greene says she will introduce impeachment articles against Biden | TheHill

Biden nih Vice President nawlngeihnak hmang in a fapa miakmainak caah power abuse a tuah. Vice Prdsident sinak hmang in a fapa caah Chinese energy companies le Ukrainian energy companies- Burisma sin in phaisa miilion in eihmuarnak an tuah. Cucaah president rian a thawk nikhatnak hrim ah a rian in phuah colh dingah kan chuahpi lai tiah Marjorie Taylor Greene nih a chim. The Washington Times

Relchih: Dawtnak a ngeimi hi mifim bik an rak si ko! US ram cu vawleipi ah mifim, mithiam, mirum le mitthawng tam biknak ram a si. Kan ngakchiat lio le bang ahcun America timi cu van le vawlei karlak khua sami ram ah kan ruah. Atu ahhin kan vawleipi nih a ngeihmi rumnak vialte i zatuak 30% tluk hi US nih a ngeih. Vawleicung ah billionaire tam bik a ngeimi ram an si. 2020 report ning ahcun US ram ahhin 614 billionaire an um. Anmah a hung changtu ram hi China an si i an nih hi billionaire 389 lawng an ngei; tam tuk in an i thlau rih.

An fimthiamnak nih vawleipi a hip dih. US cozah rorelnak Senate cu “vawleipi caah khamhtu ngan bik” (World’s Greatest Deliberative Body) ti tiang in auhmi hmun a si. Mi tampi nihcun US cozah cu “vawleipi caah ruahchannak” (the hope of the world) ti tiang in an auhmi ram a si. Sihmanhsehlaw cu tluk in a fimthiamnak a sangmi ram nihcun zei thil dah a tuah? Mi tlaihhrem an hmang: hi kaa ah tlaihhrem ka timi hi thahrum hmang in anmah nak in a derthawm deuhmi minung, mibuu, miphun le ram ukpen an hmang ka ti duhnak a si.

Nihin ah vawleicung ram tampi nihcun US cu hruhru hramghram in amah tein anmah duhning te i aa uk ve komi ram le miphun ken kip lo ah a kal hnawh i thazaang hmang in va ukpen a hmangmi ram an si, tiah an ti hna. Cucu thil sining taktak a si ko; anmah zumhning le hruaining aa hrawm ve lomi ram ca ahcun US cu ram ziachia le ram sual taktak ah an ruah hna. Hrawh khawhnak thazaang le hriamnam ngeih ahcun, atu bakah US tampi hrawh a duhmi miphun le ram vawleipi ah tam tuk an um!

Cu bantuk mi tlaihhrem hmannak US lungput cu duhsah tein an ram chung ah a lut cuahmah cang i atu ahcun uknak kong ah siseh sipuazi kong ah siseh kanmah mihrut bik pawl lung hmanh a tling kho ti lomi tuahsernak tam tuk an tuah cang. Tahchunhnak ah nai bik ah a cangmi US House of Representative nih Ni 6 chung te lawng president a ttuan cang dingmi, Donald Trump cu impeachment an tuah tthan. Hihi sualnak huaha ngei a ngei lo nain belmang thuh duh sawhsawh ah an tuahmi an tuahmi avoi hnihnak a si cang.

Impeachment tuah timi hi nikhat hnih ah lim khawhmi phun a si lo; tazacuai phun khat a si caah caan saupi a raumi a si. Zei bantuk hmanh in rang hna sehlaw January 20 hlan ah lim khawh manh dingmi a si lo. Aa tinhmi cu president a ttuan cuahmah liomi phuah khi a si nain atu ah US House nih an tuahmi cu president in aa din cangmi phuahnak tu a si. President a ttuan ti lomi cu president sinak in phuah (impeachment) tuah khawh a si lo i tuah phung zong a si lo tiah US Constitution experts tampi nih an chim cang. Asi ahcun, ziah mifim lawngte umnak US rampi roreltu buu nih cu bantuk hruh thil cu an tuah kun?

Cun sipuazi kong ah atu i US ram chung lawng siloin vawleipi ah technology lei tlaitu a simi Facebook, google le Amazon nih anmah zuam cawhtu a si kho ding ah an ruahmi Social Media Platform “Parler” cu an hrawh piak hna {a tawinak in}. Hi bantuk hi ramdang sinah US lungput zungzal a si. China nih sipuazi in hun phanh a timh deuh poh ah, kal kho loin fungfek in a tuk zungzal khah! Google, Apple le Amazon cu vawleicung company ah a rum bik le van tawng an si hna sihmanhsehlaw company hmete lawng a si rihmi Parler a tthancho dingmi le a uartu tampi nih an hmang dingmi kha an duh lo; an nah a chuak!

Ziah, hi tluk a rum cangmi company hna nihhin zeihmamh chimrel tlak zong a si lomi company hmete cu hi ti luammam hindi harsatnak an pek? US house nih Donald Trump president a tlin ti lo hnu ah president in puah an timhnak siseh, vawleicung company rum bikbik hna nih zeihmamh a silomi Parler company an hrawhnak ah siseh, a hrawktu taktak cu Nahchuahnak a si, timi a fiang bak; dawtnak an ngeih bak lo ruang ah a si ko!

Zeitluk mifim, mithiam, le mirum kan timi hna zong hi dawtnak le zawnruahnak an ngeih khawh ti lo hnu ahcun, mihrut bik lung hmanh a tling lomi hruh thil lawngte an tuah ko cang hih. Dawtnak le zawnruahnak a ngei lomi minung cu, zeitluk an fim zongah midang huatnak le Nahchuahnak lungput an ngeihmi nih a hruhter hna i zeitluk an rum zong ah sifak ah a ser hna! Cuca ahcun a minung hawi cungah dawtnak, zaangfahnak le zawnruahnak a ngeimi tu hi vawleicung ah mifim bik kan rak si ko. Rum zong ah kan rumnak cu mi bawmhnak siloin mi neknak ah kan hman ahcun mirum hrut kan si ko.

Thiam zongah kan thiamnak cu midang thlaaknak ah kan hman ahcun mihrut thiamsang kan si ko. Tthawn zong ah kan tthawnnak cu midang vuaknak ah kan hman ahcun mihrut tthawng kan si ko. A rumnak, a fimthiamnak le a tthawnnak vialte, dawtnak le zawnruahnak he, midang tunmernak, bawmhnak le cawisannak caah a hmangtu cu mifim tling an si! Lawmhnak he, Credit: Hram Bik Lian

Leave a Reply