ISIS: Covid-19 hi kan pathian hremnak asi: Atu lio vawlei pi thinphang taktak in a chiatu Covid-19 zawtnak kongah ralhrang phu (ISIS) pawl nih hi zawtnak cu Kan pathian i a ralkap pawl an si, zumlo tu hna sinah phuba a laknak asi” tiin SIT Intelligence Group sinah an chim. US President Donald Trump nih 2019 kum ah ISIS pawl a tuk hna i, October 2019 ah ISIS hruaitu Abu Bakr al-Baghdadi cu US ralkap pawl nih an rak thah.

3 January 2020 ah Iranian general Qassem Soleimani le Iran ralkap bawi 5 cu Baghdad International Airport pawngah bomb in thah an rak si fawn, an ruak zong ttha tein fimhlawm khawh loin bomb nih a rak tthekderh dih. Qassem Soleimani tu hi aa bunhmi zungbunh in amah ti an theih khawhnak si.

A cunglei kong he pehtlaiin ISIS pawl nih an chim mi cu, “Kan pathian a thinhung i Covid-19 zawtnak hmangin US, UK le Europe ramchung vialte fak piin dantatnak a pek hna. Europe ramchung an derthawm lio caan ah ISIS ralhrang pawl an tho tthan sual lai timi hi mithiam pawl nih an phan taktak mi asi. Asinan, anmah lakah cun Europe ramchung i tlawng leng lo dingin le kut i ttawl peng ding, cun an pathian lawng lawng rinhchanh dingin an forhfial ve.

Kan hnu zarh ah hmanthlak ttihnung ngaimi pakhat an tlangzarh i, Syrian ralkap pakhat an tlaihmi cu amah thlan ding an cawhter hnu ah bomb puah in an thah. Atu tiangah Iraq ramchung ah Covid-19 zawtnak ngeimi minung 1,202 le mithi 69 an um cang, cun zawtnak in a dam mi minung 452 an um. Iraq ram hi ISIS nih a uk mi ram si lo nain, Iraq ramchung ah ISIS ralhrang an umnak hmun asi. Ref: mirror.co.uk