Laimi hi khuaruahhar taktak kan rak si ko. Khua fak piin ruah hmasat loin biachim kan hmanmi le mi soiel kan rak hmanmi hi a poi kho taktak. Kanmah nih kan soiselmi cu kanmahtu nih kan sunhsak tthan. Uico nih a luak a luak ko nain a luak cu a liah tthan i a ei tthan tawn. Cu ve bantukin Hakha Pastor cheukhat pawl le upa cheukhat cu Uico bantuk cu an si hna.

Aluancia kum 2017 ah CACC hruainak Lai Idol an rak tuah i Pastor cheukhat nih thi dengin an rak soisel hna i mithmai ttha zong an rak pe hna lo i an tel duh hna lo. A fawinak in chim ahcun an lungtlinpi hna lo i an cohlanmi hna lo. Idol ti cu siasal tinak peih a si cuh tiah an rak buaipi taktak i heh an rak doh.

Tutan ah an mithmai kan vun hmuh tthan hna i an biachimmi an rak philh cikcek hi teh tiah ruahnak ka ngei. Uico nih a luak a liah tthan i a ei tthan bangin peih anmah nih an dohmi le an duh lomi cu anmah tu nih a lawmh cemmi an lawh ko hih ti ka ruat. Lai Idol ahkhan kan nau nu Esther Dawt Chin Sung hi winner a rak si.

Cun tukum ah Myanmar Idol Season 4 zuamnak ah a tel ve tthan i a teinak nganpi a kan hmuhpiakmi cu kan lawmhpi kho taktak. Chin miphun minthattertu le hmaingaltertu taktak a si. Asinain Winner a conak min Myanmar Idol ti ve tthiamtthiam a si ko. Idol ti tthiamtthim a si ko nain tuchun Hakha khualipi i donnak caan an vun hmanh cu kan Pastor te zong khuasik lakah an rak hngah ve. Chim duhmi cu Esther Dawt Chin Sung hi an don awk si lo ka ti hrimhrim lo nain Idol Winner tthiamtthiam a si tikah Idol an doh lenmi cu an philh diam tiah ka chim duhmi cu a si.

Idol kan tikah hin Dictionary zoh ahcun Siasal khi a sawh duhmi cu a si ko nain Idol hlasak zuamnak an va zuam tikah Idol kha an va biak tinak a hrimhrim lo. Hlasaktu an va zuam a si ko. Cucaah kan Pastor te zong Khrihfabu nih hi vawlei ahcun Pathian bantukin kan i zohmi hna nan si tikah Mipi nih bia kaahra kan chimmi le kan Pastor nih bia kaakhat nan chimmi  kha hmual a ngei deuh i kan zumh deuh fawn hna cucaah bia kan chim hlanah nuhmai zoh hmaasa hna usih tiah sawm kan duh hna.

Note: Hihi a ttialtu nih amin langhter a duh lo caah kan vun langhter lo. Amah pumpak in a kan kuatmi a si i amah nih attialning tein kan vun ttialmi a si. Pastor te kan huat hna tinak a si hrimhrim lo. Amah nih attialning kan vun thlahmi a si i a chimmi hi zeitindah na ruah ve?