Tukum 2020 myanmar rampi thimnak kong he pehtlai in CNF min ningcang loin a cawithlirmi kan um pah. CNF nih mah hna Party an dirkamh hna tibantuk biachovai a hung tam ngai. Cucaah, CNF kan pa pakhat a simi Solomon Thanding nih a tang lei bantukin fianternak le theihternak a tuah.

Theihternak:Tutan 2020 kawlram pumpi thimnak ah kannih CNF nih a zei party a ho party deuh ah thimfung nan pek lai tiah chimh le forhfialnak kanngei lo.Kanmah CNF policy he a khatmi party siseh, bu siseh, pumpak siseh a khat mi poah he kan tuanti. Cucaah tutan thimnak chung ah party, bu, pumpak hlawknak ding ah ka min nan hmannak hnga lo zangfahnawl le theihternak kan tuah duh ko hna. Caṭialtu: Solomon Thang Ding

CNF kong he pehtlai in thawngpang dang rak rel chih-Nihin (10/26/2020) ah CNF kan Chairman Pu Zing Cung le an nu Pi Hlim Na hruainak in CNF le Chin Baptist Churches of USA (CBC USA) hruaitu pawl tawn bia ruahnak kan ngei kho. Hi tawnnak ah CBC USA lei in President Rev. Dr. Thawngling Mualhlun, GS Rev. Dr. Thlaawr Bawihrin, Mission Director Rev. Dr. Van Thawng Lian le hruaitu dang pawl an rak ra kho. Can tawi te kar a si nain, CNF le CBC USA kan biaknak, kan ram, kan miphun kong ah zeitindah fek chinchin, naih chin chin in rian kan ttuan tti lai timi pawl tlamtling ngai in i ruah tti khawhnak canttha cansungluai tak tak a si.

CNF Chairman Pu Zing Cung nih a tu lio kan ram Politics pawl zaapi hmuh lomi, a chung ah zeidah a cang taktak timi le kan Chin miphun dirhmun pawl zaapi sin ah chim awk a ttha rih lo mi pawl a chimh hna. Hi bantuk thil um lio caan ah kan miphun vialte ttantti dih a herh ning, cu lak hmanh ah cun CNF nih bo chan tak tak mi CBC USA a bia pit ning pawl a chimh hna. Cu hnu cun Rev. Dr. Thlaawr Bawihrin, Rev.Dr. Thawngling Mualhlun, Rev.Dr. Van Thawng Lian, Rev. Sang Hre, Rev.Dr. Peter Darkham te nih biahalnak, lunlawmhnak, ruahnakpeknak, le hmailei saduhthah pawl an chim ve.

An chim mi bia vialte CNF zeitin dah kan ttanh lai, kan tthawnter lai timi lawng te a si I kan miphun caah tthathnemnak a pee ding bia ttha ttha an si. An chimmi a bia pi mi tampi lak ah Rev. Dr. Thawngling Mualhlun nih a chimmi “CNF hi hriamtlai bu tampi lak ah a tthawngbik, a tambik zong nan si theng lai lo nain, thlacampiak tu tambik a ngei tu nan si men tiah ka ruah….” a ti. Mahbia hi a hman, sullam a ngei, a thluk tuk. Pathian aa bo chan mi miphun kan si nak a hmanthlak a thar in a langh ter. CNF rianttuantu vialte caah thazang pi tak tak a si tiah ka ruah. Kan miphun vialte ca zong ah I lunghmuih, i lung si ding bia a si.

Nihin kan ni tawnnak caah an Biakinn siangngai in a kan hlanhtu Chin Christian Church (CCC), Indianapolis khrihfabu nan zaapi cung ah kan ni lawm. Abik in kan ni tawnnak ah a kan tel pi tu Rev. Sang Hre le Mang Dun pa nan chung ah kan ni lawm. Nan kan bawmhnak thawngin kan ni timhmi tlamtling lungsi tein kan lim. Caṭialtu: Daniel Sakhong