(Pumh lio i, Praise and Worship hruainak in hla kan sak ah hin Khrihfa Hlabu chung taa kan sak ah kan ni bia tak deuh!) FB hawile hna keimah nih ttial lo in Pathian rianttuan tu kan hruaitu deuh tu nih ttial hna seh law ti ka duh nain, an ceih an ttial mi ka hmuh lo caah ka lung chuak mi lungthiang te in ka vun ttial.

Vawlei cung ramkip in kan Chin khrihfabu tamngai ah pumhnak caan ttha ka ngei kho ve i ka van a ttha ngai tiah kaa ruah. A ram, a khua, a Khrihfa bu kip kan ni pumhnak kip ah pumhthawk Praise and worship kip hi Kan mino kan nungak-tlangval aw ttha deuh nih ttha te in timlamh piaknak he an kan hruai tik ah pumh a nuam i, kan hlasak a tui. Ttha te in timhlamh piak nak a kan ngei tu kan mino hna cung ah lawmh aum ngai ngai.

Nain, mah Pumhthawk Praise le Worship ah hin thiamset lo mi hlathar fung 3,4 sak nawn dih a si i, Khrihfa hlabu chung ta hi fung 2,3 hrawng lawng sak deuh ngawt a si. Hlathar pawl thiam setsai loin har ngai in fung 3,4 kan sak mi tu hi tthumh deuh uh si law, Vawlei cung Khrihfa bu tuangbia ah minung nunnak tampi a thleng tu Khrihfa hla bu kan thiam ngai mi tu hi tam deuh kan sak pi hna seh law thlarau thazang kan ni lak khawh deuh ngai lai ti ka ruat ngai tawn.

A tu mah FB ah hmanthlak pawl ka tar mi hi, CEBC, Indianapolis kan biakinn kan ni pumh lio ah ka thlak mi a si. Hlathar an kan sak pi i, i harh ngai bu in kan saa. Kan sak mi kan aw a thang lo, thiam lo mi hlathar pawl an si tik ah kan tui lo, kan hmur a cawl fang fang khi a si. A tlawm pal fung 2,3 kan sak hnu ah “kan nih kan sual sifah ing tu, kan hawi zisuh aa si lai.” timi Khrihfa hla bu chung ta kan vun sa i kan zaa pi in awthang tak tak in kan saa kho dih.. tamlak te nan hmuh bantuk i kan mit kan ni chinh i kan kut kan hlir..a thlah kan siang lo, aw!! a dang tuk hi ta tiah ka lungchung in ka ti.

Thiamset lo mi hlathar pawl zong kan sak pah rih ko lai nain, a tlawmdeuh tu in sa uh si law, Vawlei cung khrihfa tuanbia ah zumtu nunnak tampi a thleng mi Khrihfa hlabu chung hla tu hi tam deuh saa uh si law, kan pumh a tui lai, kan saa kho dih lai, a hla bia kan ruah chih lai i, thlarau thazang lak deuh nak a si lai ti a ka ruah ter ngai. Credit: Daniel Sakhong