Laimi/Chinmi biachim holh rel kan i ralrin ngaingai a herh cang. Mi ttanhcia kan thiam lo kan pical lo tuk. Tutan ah kawlram ah tuahmi hlasak zuamnak Myanmar Idol ah Chinmi chungin kan fa kan nau pathum nih an kan zuampiak khawh ve i lawmh a um taktak. An pathum tein atutiang cu an kai rih. Top 10 ah an i tel ve cang.

Chinmi kan nau le a kan zuampiak khomi hna hi, Esther Dawt Chin Sung, Benjamin Sum, Yaw Kee hi hna hi tutan Myanmar Idol zuamnak ah a kan zuampiak khotu an si. Top 10 thimmi chungah an pathum tein teinak an hmuh. Tutan kan vun chim duh bikmi cu zeidang siloin vote peknak kong chim kan duh.

Cu konghe pehtlaiin Esther Dawt Chin Sung nih atialmi zong kan rak chiahchih. Vote kan pek tikah pengtlang hoih in le Hakha Thantlang hoih in thazaang pe hna hlah usih! Minung ziaza ah cun a um phung si ko. Asinain tutan an Myanmar Idol a kan zuampiakmi hi Hakha Thantlang ti lungput in le Pengtlang mintthater duh ah si lo. Chin Miphun mintthatertu ah a si deuh. Cucaah Hakha Thangtlang hoih Vote na pek ahcun na palh lai khah!

Zuamnak timi cu an thiamnak in zoh hrimhrim ding an si. Kan unau an si ko hmanh ah zuamnak timi cu dinfel ngaingai a hau. Judges pawl zong nih ttanh hleimi an ngeih awk a si hrimhrim lo. Tutan i Judges a ttuanmi hna zong hi Khrihfa zumtu an si i ttanh hleimi an ngei lo. Zohchun awk tlak taktak an si. Cucaah Mipi hna nih Hakha, Thantlang le Pengtlang hoih in ttanh hna hlah usih!

Chin Miphun sinak in le Chin Miphun unau sinak tu in ttanh deuh hna usih! Hakha, Thantlang, Falam, Mindat ti lungput um hlah seh! We Are One In Chin (Miphunkhat) kan si timi lungput he tuin ttanh deuh hna usih! Esther hrimhrim nih Hakha, Thangtlang timi lungput in ttanh a duh hrimhrim lo. Chin Miphun sinak bakin a duh. A dikmi ttanhnak a duh cucaah a ttanh zia kan thiam ngaingai aherh. Esther nih a ttialmi rel khawh asi.

Esther nih attialmi: Chinmi cu lai hritlai phunkhat kan si ko ee. Keimah zong va tla ning law Ben le Yawki cu tha ka pek ko hna lai ee. Kanmah unau pathuam kan i zuamnak ah hi bantuk miphun kan i ttenh dihnak hna a chuah sual ahcun a zuammi kannih unau rual hi Chinmi caah Miphun tthen tertu men kan si lai ee.

Nan Kannih uunau rual kan ii tinhmi cu Chinmi hi Pathian thluachuah mi kan si, Pathian umpi mi kan si, Pathian umpi lai hritlai unau kan si timi hi zapi theih in kalpi kan duh mi a si ee. Falam Chin, Hakha Chin, Thantlang Chin, Mindat Chin ect tiin miphun dang sinah kan ii ti lo ee. Chinmi kan si kan i ti ee.

Mah le ttenhmi le mah le Idol cu free-zalong tein ttenh phung a si ko ee. Keimah zong tha petu ka si ve. Ka Idol ka duh khun mi le ttenh deuh mi cu tha ka pek ve ko ee. Minung phung si ko ee. Nan Laimi pathum kan kai ruangah i tthenttheknak si hlah seh, Miphun ii funtomnak tu siseh law Bawipa sunparnak caah We are one in chin.Credit: Esther Dawt Chin Sung