Ramkhel bia cu biafang fangkhat hmanh hi a thuk ngaingaimi asi i; innteek leiin lawmhnak bia chim timi zong hi suallam a thuk hringhran. Thantlang khuami nih CNF cu recognised a tuah diam cangmi asi ko caah khuami aiawh in lunglawmhnak bia an chimter asi.

Union leiin Kawlmi le Kawlbawi a rami pawl hmai ah, “Thantlang cu kan ram asi, kan hmun asi, kanmah kan puai asi, nanmah cu kan mileng nan si, kan puai nan kan zawh caah kan ilawm”, timi hi sullam thuk taktak asi. Lunglawmhnak bia in a hnulei ah Chin miphun nih kan khelmi tampi biathup in nalh chih asi ko. Hriamtlaibu pakhat, inntek aiawh in biachimter cu ralkap hrim cu an lautuk lai.

Inntek asimi nihcun, khual cu lunglawmte in a don awk asi. Chin miphun kan nunphung asi. Inntek cu don le hmunhma pek kan haulo. Thatnak lei tuin cuan ko hna usih. Credit: Ram Tinthei

Nihin hi ni sawhsawh a si lo, mahte khuakhaan lairelnak kan hmuhnak le Chin Miphun Ni a si: Dr. Salai Lian Hmung Sakhong. Thantlang khua ah tuah mi, Kum 72nak Chin Miphun Ni ah Dr. Salai Lian Hmung Sakhong nih, “Nihin hi ni sawhsawh a si lo, ni sunglawi sawhsawh zong a si lo, Chin Miphun Ni a si,” tiah CNF ai-awh in siseh, Thantlang khuami ai-awh in biachimnak ah a chim.

“Miphun Ni ti mi hi ni dang bantuk sawhsawh a si lo. Kuli-phorh (forces lobor) kan luat ni, Chiahpek kan luat ni, Mirang kut in kan luat ni sawhsawh a si lo. Federal Democracy phung chung ah kan luh i Mahte Khuakhaan Lairelnak Nawl kan ngeih mi Ni Sunglawi tu a si. A luancia tuanbia kan zoh tik ah hramhram pennak le uknak kan duhlo i kan kheel lengmang mi, kan doh lengmang mi a muru le a theipar kan temnak Ni Sunglawi a si,” tiah Dr. Salai Lian Hmung Sakhong nih lunglawmh biachimnak ah a chim.

Dr. Salai Lian Hmung nih a chimchap mi cu, “Panglong minthut ah Chin pasaltha pathum; Pu Hlur Hmung, Pu Thawng Za Khup le Pu Kio Mang nih min an thut. Panglong cahren caag 7nak ah Tlangcungmi hna zalonnak le sining fiang tein a langhter. Asinain, nihin ah Panglong minthut le cahren pawl tlam an tling rih lo. Cu ruang ah nihin tiang ramchung ral ti mi civil war a daih khawhlonak hi a si. Hihi, nihin ah a kan telpi kho mi Myanmar ram Ruahnakpetu Daw Aung San Suu Kyi hruainak in kar khat hnu khar khat in a kan hruai lai i tlam a tling te ko lai, ti zong ka zumh,” tiah a chim fawn.
Tuan deuh ahcun CNF lei in biachimnak nawl Cozah nih a pek lo ca ah cunglei ah an halpiak hna i atubantuk in Dr. Salai Lian Hmung nih a siaherh tampi a chim mi lak ah, “Nihin hi Chin Miphun Ni a si. Mahte khuakhaan lairelnak nawl kan ngeih mi nicaan a si,” tiah biapi in a chim mi kha kan langhter mi a si. Credit: The Hakha Post