Halkha LAI CHIN Falam: Halkha le Falam hi, Chin miphun ciau ciau zongah Laimi aa ti bik khun mi kan si i, Minung pakhat ruangah Halkha pawl e Falam pawl e ti mi bia kan hmurka in a chuak lengmang rih mi hi cu, a poi tuk mi le a poi bik mi a si. Hi hi kan ṭhinh bak cang ding le kan ngol bak cang ding a si.

Halkha nih Halkha Nu Pa kha a fak cân zong a um lai i, a soisel cân zong a um ve ko lai. Cun, Halkha nih Falam Nu Pa kha a soisel cân zong a um lai i, a fak cân zong a um ve ko lai. Cu bantuk in cun, Falam nih Falam Nu Pa kha a fak cân a um lai i, a soisel cân zong a um ve ko lai. Cun, Falam nih Halkha Nu Pa kha a soisel cân zong a um lai i, a fak cân zong a um ve ko lai.

Cu bantuk a um cân ah cun, Minung pakhat ruangah Halkha pawl e Falam pawl e i ti loin, a bia chim mi nih maw a caṭial mi nih maw na lung an tong lotu Nu Pa kha, amah pumpak pakhat kha na ti ding a si ko, Laimi Halkha le Falam karlak ah, Halkha pawl e, Falam pawl e ti mi bia hi cu, kan hmurka in chuak hrim hrim ti hlah seh law, bawmh kan herh nak zawn ah i bawm tawn hna u sih, i ṭanh kan herh nak zawn zongah i ṭanh tawn hna u sih, i daw hna u sih.

Tutan Myanmar Idol i zuamnak zongah Esther hi Halkha a si ko nain soisel a herh an ti ah cun Halkha lei mi bak nih an soisel ko, Benjamin Sum zong Falam a si ko nain Halkha lei mi zong nih a rak ṭanh tu an tampi ve ṭhiam ṭhiam ko. Cu bantuk in cun, Falam lei mi zong nih Esther a rak ṭanh tu zong an tampi ve ṭhiam ṭhiam ko, a ruang cem cu, Benjamin Sum le Esther hi, Laimi ve ve an si ruangah a si. Cu a si caah cun, Laimi Halkha le Falam hi i daw cikcek cang hna u sih. Halkha Falam Credit: Thangtea Hnialum