Thinphang bak si cang ko hih. Myanmar Idol Season 4 zuamnak i Country song in an i zuamnak result an phuan zan ah Aye Mya Phyo, Esther Dawt Chin Sung le Tan Khun Kyaw an pathum in Botton 3 thutnak ah an tthutter hna ruang le Tan Kun Kyaw a tlak hnu in Myanmar G21 Anonymous Hacker Group phu hna nih November 23 ah statement chuah in Myanmar Idol ttuanvo ngeitu upa hna le nawlngeitu hna cu ralrin nak an pek hna.

A cunglei kong he pehtlaiin G21 Anonymous Hacker Group phu hna nih an timi cu, Myanmar Idol zuamnak le Voting system he pehtlaiin felfai tein mipi nih hmuh le theih khawh dingin an vote hi langhter a si lo caah i hlennak a si tiah kan zumh, hi statement kan chuah hnu suimilam 72 chung ah Myanmar Idol ttuanvo ngeitu hna nih a tanglei bantuk in nan tuahnak theihter nan si.

1. Aluan ciami zarhchung i an i zuamnak ah an hmuh mi cio voting result cu fiangfai tein nan langhter lai. 2. Online voting ah mipi thazaang pek bik mi minung pathum hna hi zeiruang ah dah Bottom 3 ah nan tthutter hna? a ruang nan langhter fawn lai. 3. Myanmar Idol zarhchiar te zuamnak i voting result cu a caan he dik tein Live system ah nan telhchih peng cang lai.

Mah pathum kan in halmi hna hi mipi zong an lungtlin kan zumh. Cucaah atu kan in halmi hna hi nan zulh khawh lo si ahcun kanmah Myanmar G21 Anonymouse Hacker Group hna nih Myanmar Idol program i Official Website le Facebook Page pawl hi kan in hrawhpiak hna lai timi kan in theih ter hna,” tiah Hacker phu nih ralrinnak an pek hna.

Relchih: Myanmar Idol Kongah: Nizan, 10th Nov. 2019 zan, Myanmar Idol, Season 4 thawngpang nih Kawlram cu chim lo, vawleipi a hninh. Mipi a kan deuh ngai viar. Hlasak thiam kan ti mi hna, tutan Myanmar Idol ah teitu ding ah zumh cio mi, Tan Khun Kyaw, Esther Dawt Chin Sung le Aye Mya Phyu ‘Moe Tho’ tthutdan sen ‘bottom’ cung an tthut bak khan cun a zohtu thinlung a nuam lo cia. Myanmar Idol hi zeihme an ruah le an tuah hnga kan ti cio. Tthutdan sen cung tomi chungin a tla ding an um ti a langh caah a si. Taktak le ngaingai ah, Tan Khun Kyaw an thlak ruangmang ko ai. Ruahning a si lo caah Tan Khun Kyaw a tlak ruangmang cu ttanhtu biangno cung mitthli a tlang kiarmar.

Chim awk hngalh lo le zeitin hnemh awk hngalh lo ah, i bawmhchanh dingin biakhiaktu/caihtu ‘Judge, Phyu Phyu Kyaw Thein nih a van chim. Khurkhua ka ruat? Korea muicawl ‘Film’ kan zoh tawn ahkhin nawlngeitu pakhat nih cun “share” tam nawn a ngei ko, ziah tutan Myanmar Idol biacaihtu nihhin nawlngeihnak an ngei ve hnga lo maw ka ti? Aruang cu Phyu Phyu Kyaw Thein nih khan kanmah nih kan tuah khawh mi a um lo a ti cu mu? Sinain Idol kongah International Law ning cun an ngei fawn ko ‘Biacaih zung ah khin khawh-taza cuai tinak a si hnga.

Ruah lo awk a ttha lo mi cu, anmah bia bangin Voting System in a kal taktak ko a si si ahcun, tutan Myanmar Idol hi thiamnak in teinak hmuh a si lo, tangka thazaang in teinak hmuh ding tinak a si. Thiamnak ai tel ti lo ti khawh a si. Cucaah nizan i Tan Khun Kyaw a tlakmi zong hi kingro le sifak a si caah dirpi tampi lakah a zuamcawh hawi a tei hna lo kan ti khawh.

Tangka in kan Idols pawl an zuar hna ti a langhnak cu Esther Dawt Chin Sung le Aye Mya Phyu tthutdan sen cung an tthutter mi zong nih hin a langhter. Hi hna pahnih hi Myanmar Idol Season 4 teitu si dingah zumh bik mi an si. Cucaah tthutdan sen an toter mi hna hi, mipi thinphang in um hna sehlaw tangka lut ttha deuh seh ti khi an hmuitinh cu a si ko. Phun dang in kan chim ahcun chawlehthalnak Idol a si kan ti lai. Teitu va si hmanh ah khin lung a hmui ning a tak tuk ding phun a si lo.

Cucaah a mizei nih teinak an va co te tik zong ah mipi thazaang le ngeihchiah in teitu ka si timi an philh lo ding hrimhrim zong a biapi. Hmaihngal tuk le thinlung tlang sang tuk in um sual ahcun limhaang zor a fak ding phun in a um. A hlei in kanmah miphun chungin teitu va um phom hna sehlaw miphun thawng in a si tihi thinlung catlap ah an ttial i loklei lo tein umzia an thiam hau hnga. Tu kan chan cu tangka tlangau chan an ti i kan Myanmar Idol kaa zong a phih ko rua hi teh.