Myanmar Rammi Ramleng In An Rak Tlungmi Pawl Kong Ah An Lungre A Thei Ngaingai Cang: Mekong Migration Network (MMN) hna nih cathanh an chuahning in coronavirus (Covid-19) ruang ah a tu cu vawlei pumpi in kan buai lio caan a si. A ho hmanh nih kan ton bal lomi rai a si tik ah lungretheih a faak khun. Cu lak ah Greater Mekong Subregion (GMS) mipeem pawl kong ko ah hin lungre a thei. I ruanvennak thilri hna le i thlawpbulnak thilri pawl tlamtling in ngeih a silo caah tiah an chim.

Cu caah MMN pawl nih hi bantuk dirhmun ah kan dir caah an mah le an chuahkehnak ram nawlngeitu hna nih a ran khawhchung in an minung hna kong hi tuaktaan hna seh law a ttha. Phanh an i timhnak hmun le ram ah rianrangte in an phanh cio khawhnak hnga. An ngandamnak kong le an chungkhar cio runvennak kong tiang in tiah an lungretheihnak an langhter.

Thailand ram ah hi bantuk in rian ruang ah a peemmi hna hi minung 4 million renglo bak an si. Cu chung ah a tam u cu Myanmar, Cambodia le Laos hna in an si. Covid-19 zawtnak ruang ah Thailand, Myanmar le Canbodia hna cu faak ngai in an i al cang hna. A ho te hmanh nih ramchung ah kirter tthan an duh ti hna loh. Luhchuahnak hna phih an si.

Minung tampi hna cu Thailang ah rian lo, rawl lo le umnak inn hmanh ngeilo in vansangau in an um rih hna. Cu caah March 26 ah khanThailand nih Emergency Decree chuah in a rannak in hi thil kong hi remh tthan hna uh tiah a rak chuahpi. Cu bantuk in Emergency Decree zulh in March 23 ah khan ramri kham cangmi cheukhat pawl cu an hun tthan hna.

March 25 ah khan Thailand cozah nih an tuakning ah cun hi bantuk in mipeem pawl hi minung 60,000 paoh cu Thailand ah an taang ko rih lai tiah an chim. An chuahkehnak ram ah a kir cangmi hna zong nih a phunphun in harsatnak ton a si. A bik in ngandamnak kong ah. Cu lak ah hi bantuk in mipeem pawl cheukhat cu an chuahkehnak taktak rammi sinak zong tlamtling in a ngei lomi tampi an um ve hoi. Cu bantuk minung pawl ko caah cun an ngandamnak kong lawng silo in an khuasaknak ding kong ah lungdong ngaingai a si. Ref: Mizz