Kawlram Sizung 70 Leng Sibawite nih Rian Kai Lo Ding in Cathanh Chuah. Kawlram chung sizung 70 leng nih ralkap uknak tang ah rianttuan kan duh lo, mipi thimmi cozah tang lawng ah rian kan ttuan lai an ti i, rian kai lo ding in cathanh an chuah.

Ralkap uknak duhlo ruang ah rian kai a duhlomi sizung 70 leng chung ah Chin ramkulh in Falam sizung (Ihkhun 200) aa tel. Ralkap nih uknak a lak ruang ah ramchung ngandamnak lei rianttuantu tampi lungfak in an um i, rian ah kai loin “Civil Disobedience Movement” timi cawlcanghnak an tuah cuahmah. Ref: The Chin Journal

Relchih: Rampi Zatlak A Ton Lioah Ralkap Thiam A Cotermi Zong A Rak Um Ve Hoi! Rakap cawlcanghnak thiam a coter mi tete an um lenmi ka hmuh hna i ka khuarua a har tuk. 2008 phunghram a theimi nih an chim tawnmi cu “coup mechanism in waiting” an ti. Duh tik poah ah uknak lak than khawhnak lam an i sermi a si an ti.

Cucaah ram a tha cang lai kan ti lioah uknak an lak than i cozah riantuannak lamtluan vialte an thlennawn than dingmi cu a poi ko. Tu ning in a kal ahcun ramdang sanction a um thluahmah than lai. Ahodah tuar lai? Mipi an tuar ko lai. Ram a tuar ko lai.

An hrut lo i, mipi huat zaawng cun a kan hruai tuk lem lai lo. Anmah nih nawlngeihnak vialte an tlaih dih lai i a caan ah ram daw ngai le ram a sersiam ding phun in an chim rel lai. Asinain ralkap nih ram a hruainak ah ram a tha bal lo. A thangcho bal lo. Ram hruaitu ding zong ah zeitik hmanh ah hman le ruah an si bal lo. Uknak an laknak ding a ruang hrim a um lo. Phunghram an upat ko ahcun Court ah tazacuai khawhnak lam an ngei. Asinain an sungh dingmi an i hngalh caah an i tlerhkhawng i an bu thing ah ram an luh pi than.

Cheukhat nih Suu Kyi le Election tuanvo ngeitu mawh hna ah an chiah hoi. Phung le lam cungah a kal cangmi an si bantukin anmah nih thimnak aa lim cang hnuah zeidah an tuah khawh ti. Court lawng ah lungtlin lonak cu fight khawh a si cang. Nan lungtlin lo cun thimnak kan tuah than hna lai ti kha Suu Kyi rian zong si lo; Election tuanvo ngeitu rian zong si lo. A hngakchia tuk.

Court nih biachahnak a tuahmi poah zulh ding lawng an ngei cang. Ralkap nih an cohlang kho maw? No. Hramhram in meithal put in nawlngeihnak chuh kho a si ko. Thiamcoter ding pelte zong um lo; an ngei fawn lo. Thiam a cotermi hna he ralkap he ningzak an si. Luther Tin Hre