Atulio dirhmun in Kawlram hi zei lam dah a phaak te hnga. CDM cawlcanghnak le US dirhmun hi teh zeitin a kal te hnga: Zeiruang ahdah uknak laaknak (coup) a chuah Min Aung Hlaing hi tukum July 3, 2021 in kum 65 asi lai ii, Kawl ralkap upadi zulhphung (directive) ning in cun ralkap sinak dirhmun in mandatory in pension (retired) laak a hau cang ding khi asi.

Min Aung Hlaing nihhin USDP party in civilian politics ah rampi uktu a lubik (president) sinak kha ai tinhmi asi. Asinain NLD party nih November 2020 election ah a piat (landslide) in teinak a hmuh tikah a ca-ah president sinak ding lam a pit ngai cang. Kawlram mipi thinlung zoh tik zongah USDP party ca-ah hmailei ah ruahchannak a tlawm ter ngai. Cu lio ah NLD party nihhin mipi thinlung a laak khawh ngaingai.

Hi hnu kum zeimawzat chung cu election paoh ah NLD nih USDP cu tei ngai dawh peng khi asi. Cucaah ralkap hotu bik (commander-in-chief) a sinak cu caanttha hmangin meithal he hramhram in rampi uknak (power) a vun laaknak hi asi. Hihi a hlan tein aa timh ciammaam hnu ah uknak a vun laakmi khi asi ko. February 1 ah rampi uknak a vun laak a thaizing February 2 ah rampi uk-hruainak ding State Administration Council (SAC) timi a vun ser colh. Atu hi Min Aung Hliang cu ralkap lei in: Commander-in-Chief sinak he, SAC Chairman sinak he-a pahnih in a tleih.

Hmailei ah zeitin a kal te hnga: Hi SAC timi in kum khat chung State of Emergency in Kawlram cu uknakhruai asi ko lai ii, mah a dih hin cun election cu an tuah ko lai, ka zumh. Kum 1962 le 1990 lio bantukin rampi uknak hi an kalpi lai, zumh um lem lo. Asinain hi SAC tangah an hei tuah te dingmi election cu a minmen khi asi te ko lai. Ralkap proxy asimi USDP party an tei ter ko lai. Kawlram politics chungin NLD party hi rialdiit khawh chungin rialdiit le hnon an i zuam thluahmah te lai.

Tulio CDM hi teh: Kawl ralkap dohnak CDM cawlcanghnak tlukin uar ummi ramkhel cawlcanghnak Kawlram tuanbia ah a um rih lo. Mah le ti-khawhnak lam poah in rak i tel cio ding asi. Ramleng ummi nih kan ti-khawh bikmi cu phaisa in mah le tawk cio in thawh kha asi ko. Hi CDM hi a hlawhtling te hnga maw. (I know what to say, but I do not want to say this now. Time will tell us.)

US dirhmun teh: Kawlram cung ii, US dirhmun cu ai thleng dingmi a um rih lo. Amah ning asi ko lai. Sanctions pin ah zei dang a chap dingmi um rih lo. Asinain Kawlram buainak hi a vun kal thluahmah ii: ralkap le police nih ruruhranghrang in mipi vun rildiit le meithal in mipi/mibu an kah sual citcet ahcun tulio US dirhmun hi ai thleng te lai. Cu bantuk dirhmun ah asi kho dingmi scenario cu: UN tel lem loin (UN ahcun China le Russia nih an veto lai):

US le a hawile (NATO countries/Europe) he Kawlram cu ralkap thazaang in vanlawng in den khawhmi dirhmun a phan kho. Pres. Biden hi democracy a ttanh taktakmi asi. Humhaak a duhmi asi. Nizan ah a chimmi bia pakhat cu: democracy uknak hi kan himvem hrimhrim a hau (democracy must be defended) a ti. Credit: Van N Elizabeth