Chin ramkulh, Tedim peng Tonzang khuapi ah ralkap hruaitu pakhat nih a kuttangmi palik pakhat Chinpa Thang Lan Pau cu a meithal in a kah tiah theih a si i, zungah report a si. December 14 ah a cangmi thil a si i palik hruaitu pakhat Han Win Aung nih cun a kuttang pawl he Tonpeng Bahpi khua panh in an kal i Cikha le Zampi khua karlak ah i kahnak a chuak.

Lampi a kan cuahmah lio ah cun palik hruaitu Han Win Aung nih cun akuttang pa Thang Lau Pan cu ka bia ka al lengmang hlah tiah a ti i voi tiang meithal a kah. Vanthat ah midang nih an kham i Thang Lan Pau cu a khan lo i an i citmi cycle (bike)tu a khan theih a si.

Palik Thang Lan Pau nih a chimmi cu ” Heih kawng! tha tein um ka ti i, ” Awle pubik” ka ti ve. Cucu voi 2,3 ka leh i bu-kyi tuah sualmi ka ngei maw? tiin bia ka hal. Kawl holh ka thiam tuk lo i ka chim sualmi zong a um kho men. Ka ngeithiam hram law ka tiin ka timi cu ” zeiruangah da na ka leh lengmang, nawlngeitu maw na si” a ka ti i meithal in a ka kah cawlh. Ka hawile pawl an um i, Bu-kyi he in pe 5 hrawng kan i hlat. Ahohmanh nih rak kham hna sehlaw a ka kah khawh lai” tiah a chim.

Hi kong he pehtlaiin kah a tuarmi palik Thang Lan Pau nih cun Tonzang khuapi i palik zungah cun kal in ” Palik pakhat minung nunnak caah tihnung tiangin le meithal kah tiangin a cawlcang” tiah amah kaptu Han Win Aung cu phungning tein a report. (Zalen)