CNA Ralkap Paletwa An Phan. A luan cia thlathum hrawng ahkhan CNA (Chin National Army) hna cu thlanglei Chinram Paletwa an phan tiah theih a si.

“Captain Ngin Vung hruainak in CNA ralkap Battalion 2 hna cu kan hnu thlathum hrawng in khan Paletwa ah Camp va sak dingin an kal cang i, Kawl ralkap nih warning an kan pek lawng si loin, Kawl ralkap siseh AA ralkap si hna seh CNA caah ral pahnih ngei bantuk kan si caah CNF Headquarter lei zong timh cia tein kan um ko” tiah Camp Victoria a ummi CNA ralkap minlanghter a duh lomi pakhat nih Rawn Chin Post ah a chim.

CNA ralkap Paletwa an kal kong he pehtlai in CNF bawmtu Chinland Club member Salai Cung Thawng Lian nih “CNA ralkap Paletwa an kalmi hi AA le Kawl ralkap i tukdohnak ruang ah Chin miphun kan tuar tuk caah, zeiti tal in khi kaa lei ah kan cawlcang kho hnga maw tiah an kalnak a si theo lai. Cun Paletwa ah CNA an um ve cang lai caah Chin miphun nih ral pahnih ngei bantuk kan si cang.

2012 lio CNF le Acozah remdaihnak minthutnak ah Paletwa cu CNA hmunkhuarnak ah sianh a si lo. Kawl ralkap siseh, AA si hna seh CNA he hin ruah loin i tukdoh kho dirhmun an si cang. Cucaah Chin miphun nih kan Chin ralkap caah thlacamnak le chawva he kan dirkamh chin hna a hau” tiah Rawn Chin Post ah a chim.

Rawn Chin Post – Weeklynewspaper
Photo credit