World Bank nih SAC sin ah tangka thohnak nawl phihchung na si, tiah a thanh. The World Bank nih State Administration Council (SAC—Media ngan mi nih cun, Ralkap Council or Nawlngeihnak latu Ralkap Cozah) tiah an auh mi cu tangka thohnak nawl phihkhar chung na si, tiah February 22 ah khan ca a kuat cang i cucu Social Media ah a puanglang.

SAC nih Planning and Finance Minister thar ah rian a pek mi U Win Shein le Ministers dang hna sin ah copy pek in tangka thohnak nawl an phihkharnak kong World Bank nih ca a kuat hna. Cucu, Nay Pyi Taw Planning and Finance Minister Zung in Officer pakhat nih a dik mi thawng a si ko, tiah a fehter.
February 22 ah SAC nih P&F Minister U Win Shein sin ah Word Bank in Cambodia, Myanmar le Laos ram hna Country Director a si mi Mariam J Sherman nih ca a kuat mi a si. February 1 te khan World Bank kan policy nan buar ca ah cu hlan kan in kuat mi hna zong a herh tuk mi lawng ah hman a si lai. Simanking ah hman lo ding mi tangka cu kan laak than dih lai,” tiah ca a kuat.

“World Bank he rian tampi tuan mi kan rak ngei. Khuate thanchonak rian pin ah thanchonak rian dangdang zong tampi kan rak tuan. Cucu, NLD Cozah chan ah khan a si. Asinain February 1 in phihkhar than a si tik ah tangka zong thoh khawh a si ti lo. Hmailei ah thanchonak riantuanti ding zong a um ti lo. Tangka zong cawi khawh a si ti lai lo. Phundang cun, SAC hi World Bank nih an cohlanglo tinak a si ko,” tiah Nay Pyi Taw um P&F Minister Zung Officer pakhat nih a chim. (Ref: Khit Thit Media) The Hakha Times

Breaking News: Lamlai catial mi hnawhpiak ding ah Palek le Ralkap an ra nain an kir ṭhan. 2021 Feb. 24, zaan suimilaam 9:30 hrawng, Hakha Myanma Economic Bank hmai ah Mino hna nih ca an tial mi cu Ralkap le Palek nih hnawh ding in Security hngak mi an rathnawh hna nain Mino an tam ca ah an kir than.

“Ca kan tial mi hi voi hnih an kan hnawhpiak cang ca ah tuzaan cu security hngak usih kan ti.Mino zeimawzat nih kan hngah lio ah Ralkap le Palek cu tam ngai an rak phan.Hakha Mino kan i ko (au) hna i mino a thong deng kan chuak manh. Palek le Ralkap zong cu hriamnam tling he an ra nain an kir than,” tiah CDM cawlcanghnak ah aa tel mi mino pakhat nih The Hakha Times ah a chim.

February 23 zaan ah a voi hnihnak an hnawhpiak cang hna. A hnawttu hna hi, “CDM ah aa tel lo mi Sipin riantuantu, Palek le Ralkap an si,” tiah min langhter lo mi CDM ah aa tel mi pakhat nih The Hakha Times ah a chim. Tuzaan (Feb. 24) belte mino nih an congh i hnawt ngam loin an kir, tiah kan theih. Source: The Hakha Times