Kannih Cu Cozah Kan Chawn Lo, A Nung Mi Pathian Lawnglawng Kan Chonh: Donald Trump

Kannih cu cozah kan chawn lo, Pathian tu kan chawnh, President Trump. Pastor Andrew Brunson nih President Trump cu thla a campiak. Trump thla a camhmi cu hitihin a cam. Ka Pathian atu ah hin Donald Trump cu fimnak le theihthiamnak chiti vun thuh law, Theihnak le tthawnnak pe in vun thuamh law, Pathian ttihzah in a um khawhnak ding le a hna in a theih mi le a mit in a hmuhmi hna le amah nih a theihning in biachahnak tuah loin,

Nangmah duhning in biachahnak a tuah khawhnak hnga Thlarau in umpi ko. Ahodah zumhtlak a si i, ahodah zumtlak lo a si timi a theih khawhnak dingah a dik mi biachahnak pe law amah le ramkip fahnak ding i, hlennak le i rawiphirnak vialte hna cu a ceumi ah vun langhter piak law cubantuk thil hna cu an i ruah loning in umter ko hna.

Pa Pathian sin in a chuak lomi aw le thiltuahmi vialte hna cu Jesuh min in ka tthawl dih hna. Nangmah sin in a chuakmi diknak le remnak nih cun White House cu khuakhang ko seh.Kan biakmi kan Pathian, harsatnak a um cuahmah lio ah Donald Trump cu khuakhan lairel dingin na vun thlah i, nangmah Jesuh lawnglawng nih hin mitthawng hna cungah teinak a pe khotu le a harhmi vialte caah khuakhan lairelnak a dikmi ape khotu cu na si.

Din loin amah hi umpi law, a dohtu vialte hna an cungah a um khawhnak hnga tthawnnak le raltthatnak in thuamh law tharchuah lengmang ko.Kan biakmi kan Pathian, Donald Trump cungah na thinlung a nem ti ka hmuh i, Nangmah naih dingin sersiam law nangmah theih hi lawmhnak a si tiah theihter law, a thinlung dihlak vialte a thlarau le a tthawnnak vialte in an dawt khawhnak hnga tihal rawlttamnak pe hram ko sawh, Cuticun na sin ah vungkal in na min a hlam tikah hmailei panh in na min aupi seh kan Bawipa Jesuh min in thluachuah ka pek. tiah thla acam piak.

Hi konghe pehtlaiin Donald Trump nih Pastor Andrew Brunson cungah lunglawmhnak bia a chim ve. Atimi cu athlum tuk mi thla a ka campiak mi cungah ka lawmtuk hringhran. Ka caah a sunglawi taktak mi a si i, kan dik nak hna hi Pathian thawnnak in kan hmuhmi a si caah ahohmanh nih aa kan lakpiak khawh mi thil a si ti lo.Kan dih lak lungrual tein cung Paathian nih aa kan pek mi kan Rights hna hi kan kilven hrimhrim a hau tiah a chim.

Cun tuzarh ah hin 50 million renglo cu Syria ah a ummi Khrihfa mi hna ca le biak fami hna caah bawmhnak kan pek i, Ningani ah khan cuthil cu peknak kan tuah cang. Hithil vialte hi Pastor Andrew Brunson upat nak caah kan tuah mi a si.Kan caah thil lianngan taktak a tuahmi hna caah Syria ramchung ah a ummi hna kan bawmh hna lai tiah a chim chih. Culawng siloin kan cozah nih Iraq le Syria ah a ummi Khrihfa hna bawmhnak ah half billion reng lo zong pek an si cang,” tiah a chim chih.

Hi thil hna hi president dang pawl nih cun an tuah duh ka zum lem lo. Sihmanhsehlaw kannih kan cozah nih cun vawlei cung hmukip ah a ummi fahnak le hremnak a tuarmi Khrihfa mi hna hi kan dirkamh hna lai timi hi ka biakamnak le kaa timh mi a si. Kan thinlung le kan Thlarau hna cu ralttha tein zumhnak angeimi le hremnak a tuarmi hna pawngah a um ve ko,” tiah US President Donald Trump nih cun a chim rih.

America ah hin cozah kan chawn lo i, kan bia lo. Kan nih cu Pathian lawnglawng hi kan biakmi a si.Thil biapi kan tuah hna lai, ram mipi hna pawngkam siseh, ram a dawmi Khrihfa zumtu ttha si ding i aa kan funtomtu dawtnak le zumhtlak sinak hna cu tthawng le cak ngaiin kan kalpi hna lai. Miphun pakhat ram pakhat, US pakhat bantukin zalonnak le adik mi langhtertu mi ralttha hna ram le zumtu ttha hna umnak caah kan dir peng hna lai. Zungzal in zeitik caan paoh ah America nih hin zalonnak le thlacam thilti khawh tthawnnak le zungzal in Pathian sunparnak caah a fekmi zumhnak kan chiah hna lai,” tiah a chim fawn. Mah bia hi a luancia cacawn nirukni ah a chimmi a si.