Kanmah nih kan thahmi a si lo tiin Ralhrang pawl nih a chungkhar an hlen hna

Myanmar News

Shan ram, Taungkyi khuapi Administration office Mei a kaang mi a hmit tu pa cu Ralkap nih an tlaih i nihnih hnu ah a ruak chungkhar sin an rak pek. Asi nain a takpum an rak khuai i dawhcah lo ngai in an rak thit tiah The Irrawaddy News ah hmuh a si.

Cu lawng hmanh si loin “Mei thahnak motor nih a pah sual ruang ah a nunnak a liam mi a si tiah chungkhar sin ah medical catlap cu an rak pek chih hna” tiah Irrawaddy News nih cun a tarlangh.

Tuksapur in an thah mi pa hi a min ah Aung Paing Htwe (kum 30) a si. April 4, 2021 zaan suimilam 8pm hrawng ah Administration office mei kanghnak a chuak i cu lio ahcun Ralkap le police nih an rak tlaih i an kal pi hi asi. Inn kanghnak hmun i ralkap a va phak cang ka in, Aung Paing Htwe le midang cu an tlaih hna i zung a khangtu an si tiah anmah lehlamtu sualphawt in an puh hna.

Nizaan April 6, 2021 ah khan a ruak cu chungkhar sin ah an rak pek hna. Cu ahcun a takpum ah tukvelhnak hma fak ngai a um lawng si loin a mithmai zong a rawk ngai ngai. Cu lawng hmanh si loin a tamtuk cu tuksapur in an rak khuai i tha tein hmanh in ṭhit piak a um lo ti asi.

“Nan fapa hi Administration office mei kaang mi a hmih nak ah Mei thahnak motor nih a pah sual, cu ahcun a lu fak ngai in aa khawng, cun a ttaang ah motor nih a suk ruangah a chuap faktuk in a hliam i a nunnak a liam” tiah Ralkap Sibawi nih medical catlap ahcun ca a tial i chungkhar cun a ruak he an rak pek chih hna ti asi.

April 4, zaanlei suimilam 8pm hrawng ah Administration office mei a kaang, cu ahcun pawngkam minung nih Mei cu an zuan hnawh i heh tiah an hmih, cu lio ahcun Ralkap nih minung 4 an tlaih hna i an kal pi hna hi asi. Cu lak ahcun Aung Paing Htwe timi pa cu a ruak in April 6 ah chungkhar sin ah an rak pek hna hi asi.

A takpum an thlehbauh ning zok tikah ralkap nih a chungril an lak dih timi a fiang. Nizaan ah khan Ralkap Sibawi pakhat nih “Nitin te minung chungril an kan chuah ter, minung lung le thin cu an lak i China sin ah an zuar, cu bantuk cu ka duh ti lo caah ka zam” tiah DVB ah a chim. Atu an thahmi Aung Paing Htwe zong hi a chungril an lak dih timi cu a takpum an ṭhit ning le a paw an hlai mi zoh in theih khawh a si ko.

Leave a Reply