Kan Pale Pahnih An Zumhnak Aikhat Bak Lo Hi A Poi Ngai A Zeideuh Hi Dah Ahmaan Deuh Lai?

Hmuhning

Biakam Thar Tialnak Grik Holh ah Holh Theihlo Timi Biafang A Um Ko. February 25/ 2020: Mi cheu khat nih, “Original Bible,” ah holh theihlo timi biafang a um lo, leh palhmi Baibal lawngah a um,” an ti. Cucu a dik lomi bia a si; a ngai ngai ti ah cun Original Bible cu hmuh awk a um ti lo, hihi a hlun bik theu lai tiah an ruahmi hna hmanh cu an tling ti hna lo, a cheu chum tete lawngin hmuh khawh an si. Cucaah a tu i hman liomi Hebrew Bible le Greece Bible zong hi Original an si ti lo.

Cun, “Holh theihlo timi biafang cu Lehpalhmi Baibal lawngah a um,” an ti rih hoi. Cucu an palhmi a si. A ngai ngai ti ahcun kan ngeihmi Baibal Version vialte hna hi Baibal a lettu hna nih an zohchihmi Hebrew le Greece Dictionary chungah a sullam a phun phun a ummi chungin an dik bikmi biafang asi lai tiah an ruahmi an thim tawn. Cun a dik cio cio mi ah an duh bikmi biafang kha an hman tawn. Cuticun cu Vision, Kha Version tiin min an bunh ciomi a si. A ngai ngai ti ahcun Version vialte hna khi Balbal a lettu hna nih an duhmi biafang thim in an tuahmi (word choice) an si dih hna.

Cun, “Grik holh ah glossa tiin a um caah holh theihlo tinak silo in holh tinak a si,” an ti. Hihi cu a dikmi an chim. Hngalh awk a herhmi pakhat cu glossa timi cu holh tinak a si caah theihmi holh tinak a si lo i holh theihlo tinak zong a si fawn lo; holh tinak a si. Cucaah holh timi ah kan theihmi holh zong a um i kan theih lomi holh zong a um ticu al khawh lomi biadik a si. Glossa – Holh timi chungah hin Biakam Thar tialnak Grik holh ah Biafang phun nga aa khumhchih. Cu hna cu: (1) Glwssai, (2) Glwsswn, (3) Glwssh (4) Glwssan le (5) Glwssoi hna hi an si.

Biakam Thar tialnak Grik holh hmaning cu a tanglei bantuk in an si hna. 1. Glwssai New tongues (Mar. 16:17), Other tongues (Lam. 2:4), Speak with tongues (Lam. 10:16; 19:6; 1 Kor. 14:5, 6, 18, 22, 23, 39 ), The tongues man & angel (1 Kor. 13:1), 2. Glwsswn Divers kinds of tongues (1 Kor. 12:10 voi 2 a lang), Diversities of tongues (1 Kor. 12:28). 3. Glwssh Unknown tongues (Holh heihlo), tiin a hmannak Baibal cang hna. (1 Kor. 14:2, 4, 9, 13, 14, 19, 27). 4. Glwssan
A tongues (1 Kor. 14:26) 5. Glwssoi Other tongues (1 Kor. 14:21).

Biatlang kawmnak: Baibal kong kum 40 chung a hlathlai hnuah Baibal Cauk a tuahtu Dr. Desk nih a Cauk Desk Bible chungah Holh Theihlo (Unknown tongues) timi a hman ko. Cun Siangpahrang James chan lio i Baibal Lettu ah an thimmi hna minung 47 nih holh theihlo (Unknown tongues) timi an hman ko. King James Version a tuahtu minung 47 hna hi Hebrew le Greece a thiam bikmi an thimmi hna an si. Cu hna lakah pathum hi Greece Dictionary a tuah khotu an si. Greece Dictionary tiang hmanh a tuah khotu le Hebrew le Greece a thiam bik bik 47 hna kha Nihin Laimi kan Mifim hna le Baibal lei Thiamsang kan Pale hna nih hin nan tluk kho hrim hrim hna lai lo.

New International Version Baibal a tuahtu hna zong nih holh theihlo timi biafang an hman ko i Today English Version a tuahtu zong nib an hman ve thiam thiam ko. Laimi kan Pale cheu hna nih nan lehmi Baibal belte ahcun nan hlonh dih ai! Laimi kan vanchiat phun khat a si tiah ka ruah. Kan in upat hna, kan in bochan ko hna; sihmanhsehlaw Thiang Thlarau Riantuannak le Thiang Thlarau laksawng nan dohnak kong ah cun nan palh ngai ngai. Cucaah Baibal Hrampi Greece holh in tialmi Biakam Thar nih Holh Theihlo timi (Glwssh) biafang a rak hman ko, tihi biadik a si. Paul nih, “Nanmah nakin holh theihlo in tam deuh ka holh caah Pathian ka thangthat,” “Holh theihlo in holh kha thlauh hna hlah u,” a ti. Servant. B. Khamh Bawi Aung Current# Falam, Chin State, Myanmar

Dr. Aung MyiN Thang nih attial vemi: HOLHTHEIHLO LIH ASI FIANTERNAK. Ca na rel dih lo ahcun comment rak ttial hlah tiah kan nawl hmasa.

1. HOLHTHEIHLO TIMI BIAFANG CU BIBLE AH A UM LO

Lai Bible ah holhtheihlo tiah kan hmuh lengmangmi biafang hi Lai Bible an lehmi version Good News Bible ah a ummi asi lo. Mizo nih King James Bible a leh I cu King James kha “Tawngtriatlo” timi kha an I cawn I an hmanmi biafang asi. Bible Biakam Thar cu Greek in an rak ttialmi asi I Greek Bible pohpoh ah holhtheihlo timi bifang a um lo.

2. Greek Bible ahcun “glossa” ti asi I cucu “holh” tinak asi. “Theih lo” timi kha Greek Bible ah a um lo. Miphun pakhat nih an holhmi holh kha asi. Atu Laimi nih holhtheihlo nan timi hi an I leh palhmi Bible in a rami biafang a si. Thlarau thil peek le Thlarau rianttuannak, Thkarau theitlai ah ai telmi asi lo.

3. Jesuh nih a zultu hna cu Thiang Thlarau kha nan co lai I vawlei cung pumpi ah ka tehte nan si lai a ti hna. Asinain a zultu hna kha a tam deuh cu cawnnak negimi an si lo, miphun dang holh zong a thiammi an si lo caah miphun dang holh, holh dang, other languages (other tongues) in chim phuan khawhnak kha Thiang Thlarau nih a rak peek hna.

4. Thiang Thlarau nih a rak peekmi hna cu holh dang in holh khawhnak kha a rak si I, cu holh dang cun miphun dang hna sinak Jesuh dawtnak kong kha an rak phuan khawh. An thiam bal lomi holh bakin an rak holh kho I cucu khuaruahhar tuk a rak si caah holh dang in holh cu zumlotu hna caah zumh khawhnak caah hmelchunhnak a rak si (1 Kor. 14: 22). Atu I nan hmanmi dididededadaduddu timi hicu zumlotu caah zeihmelchunhnak hmanh asi lo. Lih fangfaak asi. Holh dang cu leh khawh an si dididededudu ti cu leh khawhmi asi lo. Holh asinlo. Cucaah Paul nih a lettu um hna seh atiminkha asi. Holhtheihlo si loin holh dang in an rak holh caah an rak leh khawh. Laimi holheihlo cu lih asi caah leh khawh asi lo.

5. An thiam ballomi miphun dang holh cun Pathian sinah bia thup chimnak ah an rak hman. Pathian sin lawnglawng ah chim an duhmi, zaapi theih awk ah an duh lomi chimnak caah an rak hman (1 Kor. 14: 2). Atu I dididededada timi hin cun zei bia hmanh chimh khawh asi lo. Lih hmanh ai chim kho lo. Atu I nan hmanmi hicu holh a si lo. Cu miphun dang holh in chimkhawhnak cu Pathian nih minung hna sinah an phuan I bia a chimmi vialte a tlin I, cu ai phuannak cu tlingtein ttial piak kan si ahkhan miphun dang holh I holh khawhnak cu a dong (1 Kor. 13: 8-12).

6. Holhtheihlo nan hmanmi lih asi a fian rih ning cu vawlei cung ah Pentecostalism ai thawknak hi kum 100 fai lawng asi rih I holhtheihlo nan lih I nan holh hi kum 100 lawng asi rih. Khrihfabu ah Thiang Thlarau nih rian a ttuannak cu kum 2000 asi cang nain holhtheihlo nan umternak hi cu kum 100 lawng asi caah lih asi a fiang khun. Holhtheihlo hi Thlarau thil peek rak si taktak sehlaw holhtheihlo Khrihfa nih an hman hi kum 100 lawng asi hnga lo.

7. Cucaah Kawl Bible ahcun miphun dang holh tiah an leh I Saya Rual Uk Bible zongah holhtheihlo tiah a lehmi a um lo, holh dang tiah a leh ve. Dididdededadad ticu holh asi lo. 8. Holhtheihlo nan lih asi ti a fiannak cu a hlan ah cun nan lih in nan rak holh I cucu holhtheihlo tiah nan rak ti. Asinain atu ahcucn hla in nan sak I nan rock. Holhtheihlo hla ti lebang cu an I lehpalhmi Bible hmanh ah a um lo. Nan phuah chommi asi. Holhtheihlo hlasak nan thok nak kum 15 hrawng lawnglawng asi rihmi zong nihhin lih a si nak a langhter fawn.

9. Holhtheihlo lih asinak rih cu Kawlram a rami missionaries vialte an holh bal lo. Church father pawl zong an holh bal lo. 10. Holhtheihlo timi biafang cu King James Bible ah Unknown Tongues tiah a hman. Unknown timi khi Greek Bible ah a um lo caah sirsawt in a ttial. King James nih unknown tongues a ti nak cu hngalh lomi holh, miphun pakhat nih an hngalh lomi holh kha a chim duhnak asi. Asinain Laimi le Pentecostal pawl nihcun miphun dang holh tu siloin nanmah nih nan ser chom I cucu Thlarau thil peek nan ti.

11. Pa a vawlpaam mi cu ngeihthiam an si lai, Fapa a vawlpaammi zong ngaihthiam an si lai. Asinain Thiang Thlarau a vawlpaammi cu ngaihthiam asi lai lo tiah Jesuh nih a ti bantukin Thiang Thlarau nih a tuah lomi nanmah nih lih I nan phuah I nan chimmi holhtheihlo hicu Thiang Thlarau volhpamh bak asi caah ngaihthiam lai cu I ruah hlah uh.

12. Bible cu Khrihfabu kan I hrauinak caah Pathian nih a kan peekmkii asi caah Bible ning lawnglawng in kan kal ding asi I Bible I a umlomi nan phuah chommi vialte hi cu lih lwngte a si caah holhtheihlo I a holhmi le hla a sami cu nan caah ttih a nung tuk Corona virus bantuk asi.

13. Atu ahcun holhtheihlo I a holhmi le holhtheihlo hlasak a hmangmi nih crusade an tuah lo ahcun pumh hrimhrim an I tim ti lo. Holjhtheihlo hla nan lih in nan saknak le nan rocknak hmun poh ah revival a tla nan ti fawn.

14. Khrihfabu cheukhat ahcun pumh thok ka in holhtheihlo hla an sa I chairman zong a dirk ho ti lo, thawhlawm khawlhnak zong a um ti lo, phungchimnak can zong a um ti lo, zan 11 tiang hna an sa I cun an ttin beh. An I pumhnak kha holhtheihlo hlasak in an thok I holhtheihlo hlasak in an dong tthan.

15. Cucaah holhtheihlo cu thilnu bantukin a tthang I a hmangmi caah riitnak le hruhnak asi. Holhtheihlo a duhmi hna nih cu lih a duhmi an si caah biatak kha an duh ti lo. Hi vialte Thlarau thilpeek vialte I a dang pakhat hmanh co hna lo I holhtheihlo holh hna a saang bik I nan va ruah hi cu ka khuarauah a har. Bible I a ummi cu si sehlaw phun dang.

Thlarau thil peek tthattha lak i holhtheihlo nanmah nih nan tel termi hna nan uar bikmi asimi zonghi lih asi. Cucaah holhtheihlo cu Bible ah a umlo, Thlarau Thil peek ah ai tel l, Thlarau theitlai ah ai tel lo, Thlarau rianttuannak ah ai tel lo. Nan lih in nan phuahmi asi. Hi kong ah nan lungtlin lo ahcun global debate nan hrih khawh. Asianin keimah nih kan tei hna lai. Zeicatiah ka chimmi hi Bible ning cu asi. Aung Myint Thang

Leave a Reply