CNF le Thantlang khuami nih Cakei Pawpi an kan kah piak! A tu tan kum 72 nak kan Chin miphin ni (Chin National Day) cu Thantlang khua nu khua pa hna nih dawh tuk le sullam ngei tuk in an kan tuah piak. A puai tuah lawng hlah! Thantlang khuanu khua pa, CNF aiawh tu upa hna, Daw Aung San Suu Kyi le kan pa Vice-President Pu Henry Vanthio hna khuakhan nak in Dr. Lian Hmung nih tuanbia kawlram pum pi le kan Chin miphun tuanbia ah a nung lan ding mi bia roling ral ttha te in a chim phuan nak a ngeih.

“ Kan ram caah Democracy phung lam kan khel nak ah kan tinh bik mi cu Ralkap nih kan ram uknak ah an i tel mi hi dongh ter in, kan ram pumpi ralkap hna nih mipi thim mi uknak le nawlngeihnak tang ah um i ralkap rian bik a si mi kan ram pumpi run ven nak rian an ttuan ding (civilian supremacy and democratic civilian control over armed forces ti mi) hi asi.

Mah cucu democracy a duh mi vial te nih kan duh dih nain, a ho hmanh nih formal meeting/event le biaruahnak ( Phung ning te in tuah mi puai) ah an phuang ngam in an chim ngam rih lo. A tu tan Thantlang Chin National day nisunglawi puai ah fiang lak in CNF Vice-Chairman a ttuan lio ve mi kan pa Pu Lian Hmung Sakhong nih ralttha te in a chim. Mah roling bia hi hmailei democracy kan khel nak ah tampi bawmh chanh tu le a lam a kan pemh piak tu ding a si.

Democracy ka duh a ti mi vial te nih kan i lawm i kan lung hmuih tuk ah kan lairam i a um mi Sahrang Pawpi a kan kah piak tluk ah kan ruah i kan cawng lawmh! A bik in Thantlang khua nu khua pa hna, kan miphun ramkhel lei cawlcangh nak ah tuanbia dawh nan kan ttial piak tthan mi cungah kan i lawm, kan in upat hna. Kan hnu lei ah Chin miphun vial te tawn biaruah nak Chin National Dialogue zong nan kan tuah piak rih! Lawmh nan um tuk! Thantlang khua le a khua mi nan za te kan Pathian nih thluachuah in pe zungzal hram hna seh!Credit: Za Ceu Lian