Tukum Kum 2020 Myanmar ram tanghra camipuai ah Myanmar ram pumpi ah ဝိဇ္ဇာတွဲ in mark tambik (6D) hmutu Salai Bo Htaw@Wai Yan Lin Kyaw cu Yangon ah Chin Christian Alliance (CCA) nih lawmhpinak puai an tuahpiak tiah kan theih.

Tanghra camipuai ah 6D hmutu Salai Bo Htaw@Wai Yan Lin Kyaw cu Chin Christian Alliance (CCA) nih lawmhpinak puai an tuah piak i cu ah cun hlasathiam Tan Khun Kyaw le Esther Dawt Chin Sung hna zong sawm an si ve.

Tutan ah lawmhnak an tuahmi Salai Bo Htaw@Wai Yan Lin Kyaw cu Ayeyarwaday ramṭhen, Kyaing peng, Yenantaung High School sianginn a kaimi a si. Tukum Myanmar ram tanghra camipuai ah tuition kai lo bakin Myanmar ram pumpi ah ဝိဇ္ဇာတွဲ in mark tambik a hmutu a si.

Salai Bo Htaw@Wai Yan Lin Kyaw cu Myanmar ram tanghra camipuai ah ဝိဇ္ဇာတွဲ in mark tambik a hmuh lawng si loin 6D in a kan hmuh piak rih. 6D a hmuhmi hna cu Myanmar, English, Mathematics, Geography, History le Economics in 6D (kungṭhu/dicstintion) in tangra camipuai a kan awn piak.

Hniang 2020|08|2020 ah Chin Christian Alliance (CCA) nih Yangon Novotel Hotel ah lawmhpi nak le upat sunlawihnak roca peknak an ngeih tiah kan theih. A sunglawi tuk hringhran. Hmailei a lamthluan ah Pathian nih lam hruai in umpi ko seh!

Eshter Dawt Chin Sung nih hitihin lawmhpinak ca a ṭial ve, “Nihin chun ah 6D a hmumi le Kawlram pumpi chungah pakhatnak a hmumi Salai Bo Htaw lawmhpinak puai ah ka kal kho ve. Tuition zong kai bak loin le mei zong ngeih lo bakin harsatnak tampi lakah zuamnak fakpi he hlawhtlinnak a hmuhmi ruangah ka lawmhpi tuk hringhran. Pathian nih thluachuah pe chin ko seh” tiah lawmhpinak ca a ṭial ve.