Tutan ah kan tarmi hna hi kan naunu Esther Dawt Chin Sung le A Pu Ral Eng Khenglawt nih an chimmi a si. A dih cangmi le a luanciami ta a si cang ko nain a rel rih lomi le a theih rih lomi kan tampi rih lai tiah ka vun share tthanmi a si. Kan naunu Esther Dawt Chin Sung a lungthin a rak pical taktak uar a um taktak si.

Atu lio Myanmar ram lawng si loin vawleipi (Myanmar rammi sin ah) a hnin khotu Myanmar Idol Season-4 ah Winner Esther Dawt Chin Sung nih “Kei mah lawng hmuh mi a si lo, Chin miphun kan dihlak nih kan hmuh mi a si” tiah mizapi nih donnak Carson Hall, 2020 January 5 ah a chim.

“Atu bantuk in Myanmar Idol ah winner ka hmuh mi hi keimah thiamnak thawng in a si lo. Pathian le a ka dawtu hna nih nan ka dawtnak thawng in a si. Hi teinak hi keimah lawng nih ka hmuh mi a si lo. Vawlei cung hmunkip ah a um mi Chin miphun kan dihlak nih kan hmuh mi a si. Phundang in kan chim ahcun Chin miphun hi hmunkip kaakip ah kan i thek dih nain pum khat kan sinak kan langhter khawh ti ka hmuh i kaa lawm khun” tiah Idol Esther Dawt Chin Sung nih donnak hmun ah lunglawmhnak bia a chim.

Esther Dawt Chin Sung nih a pehchap mi cu “Chin miphun cu mi tlawmte kan si. Hlan ahcun miphundang nih an kan namneh i zeirello mi miphun kan rak si nain Pathian nih nihin ahcun a lamkip in a kan cawisan ti ka hmuh ca ah Pathian min ka thangthat. Cun Christmas ni ah khan, Bawipa tutan Idol hi Christmas laksawng ah ka pe ko tiah Bible cung ah thlacam nenh tein ka hal i a ka pek taktak mi a si i Pathian Amin ka thangthat” tiah a chim fawn.

Tutan Myanmar Idol Season-4 Winner Esther Dawt Chin Sung nih hi laksawng hi keimah lawng hmuh mi a si lo, a ti bantuk in laksawng a hmuh   mi   zong    harsa, ngaktah le sifak bawmhchanhnak ah pek a timh, tiah kan theih. Credit: The Hakha Post. Atanglei ah a pu nih achimmi kan rak chiah chih rel cio uh!

Ramkip Um Hawi le Hna. Ka thinlung chung ah chim lo in ka um khawh bak lo mi thil pakhat aum. Ka tunu Esther Dawt Chin Sung nih MM IDOl season 4 ah Teinak trophy( laksawng) he chuahsemnak Hakha khualipi atlun tik ah sunglawi taktak in an don i upat nak phun phun an pek mi ka hmuh tik ah ka lawm tuk ko.

Sihmahsehlaw, kaa lawmh nak, ka thinlung hi DON NAK PUAI ah aumlo. Ramleng um mi ka hawile nan sin ah aum.. Ka nun chung ah ka philh kho lai lo. Ka lawm tuk. Ka mitham le ka thinlung ah ramthumnak a um mi khuami, cingla rualchan le hawikom vial te nan um dih. Ka lawmhnak ngan bik ka chim phuan nak ding nan si.

Atak tak le ngai ngai ti ahcun Esther vote peknak phaisa dihlak 85% percent hrawng hi ramleng in nan bawmhmi/ kuat mi asi. 15 % hrawng hi ramchung lei nih an vote khawh mi asi. ramleng hmunkip in, hawikom nih rak dirpi hlah uh sihlaw Esther nih aput mi Trophy -laksawng hi a um hnga lo. Pathian nih an hman hna i nan dawt ruang ah asi. Cucaah zeidang vialte nak in, Ramleng in hawikom dawtu vialte nan sin ah upat nak sang bik kan pek hna. Esther Teinak hrampi nan si. Credit: Ral Eng Khenglawt