Kan Naunu Caṭial Cu Uar A Um Kho Taktak “Bawipa Damnak Tling Ka Duh Ko Sihmanhsehlaw Cu Cu Ka Minung Duhnak Lawg A Si Caah Ka Nunnak Ka Zeizong Hi Na Ta A Si” Tiah A Ṭial

Hmuhning

Halkha sizungah ummi damlo kan Naunu hi zohchun awk tlak ngaingai a si. A facebook ah siseh, thawng an zamhmi tibantuk ah comment tete a pekmi zoh tikah a lungput a puitling taktak uar a um hringhran. Atu lio cu Social Media zoh tikah a konglam tampi an ṭialmi hmuh khawh le theih khawh a si.

Cu lioah kan Naunau te cu lungzor loin le thazaang der loin thazaangtu i lak riangmang in bia dawhdawh lehnak a tuah tawn hna. Midang cu si usih law kan celh lo men lai. Konglam chia an ṭial cu chim lo, kan konglam an ṭialmi hrimhrim khi kan celh lai loh.

Asinain kan Naunu hi cu a rak si loh. Mino te a si bantukin a caan ah cun a lungzor caan zong a um kho men nain intuar khawhnak a ngei. Cun zeizong vialte ti khotu Pathian nung ka ngei timi aifiang tuk ti a caṭial tete ah hin hmuh khawh a si. Thil timi cu ahmaanmi zong a um lai i ahmaan lomi zong a um lai cucu vawlei phung zong a si i vawlei kan um chungah kan ton dingmi hrimhrim a si. A ṭhatnak in thawngzamhtu an um lai i a sining loin azamhtu zong an um lai. A phung si ko. Kan Nannu te nih a timi cu “Media pawl zong nanmah le nan riante nan ṭuan ko asinain thawngpang a fiang lomi kan thlahpiak hlah uh,”tiah a ti.

Tutan ah kan rak chiahmi hi Biangreithlep 01|05|2020 ah a rak ṭialmi a si. Zeiruangah dah atu pi ah kan rak chiah ṭhan kan ti ah si ahcun hi ca a ṭialmi hi Mipi nih thei ve hna seh! Kan naunu lungput zeitluk dah a ṭhawn le zeitluk in dah uar a um a lungput a puitlinh le Pathian aa bochan ti mipi theih ve hna seh kan ti caah kan vun chiahmi a si.

Ka Naunu a ṭialmi cu “Minung lei cun ngaihchia lengding lungfaak ngai le tha zaangder ngai in mitthli he ka um ko rih a caan ah harnak in a mui hmuhter a kan duh tu pathian na khua khannak hi minung leiin theih thiam le tuar thiam a har i lungfah lungdongh caan zong a tam sihmanhsehlaw lung donghnak pin leiah kan ruah banh khwh lo tiang in damnak le ṭhawnnak petu na si caah ka lom na min kan thangṭhat tuk Bawipa ka nunnak hi na ta a si i nangmah nih na duh ning in run hmang hram ko bawipa k thih zg ka nun zg ah na ta a si mi k nunnak kongah zeihmanh duh thim nak ka ngei lo ka cung tlungmi thil poh ah mitthli he a si zongah lungtling tein cohlan le na sinin vuivai loin le thlarau thinlung taksa ṭhawng tein ka dir i na min in harnak ka tei khawhnak hnga ka bawm hram ko Bawipa damnak tling ka duh ko sihmanhsehlaw cu cu ka minung duhnak lawg a si caah ka nunnak ka zeizong hi na ta a si bantukin ka cung tlungmi thil zeipoh hi nangmah nawl si ko seh ka cung i tonmi poh na min in lunglom tein ka cohlan i ka tuar ngam Bawipa,” amah facebook cahmai ah aṭial.

Note: Kan naunu a ṭialning in kan rak chiah ko. Asinain a biafang hmaanmi tete kan remhpiak. Remhpiak kan ti tikah a biafang tling loin a ṭialmi tete um caah cu bantuk cu kan remhmi a si. Amah ṭialmi hmanthlak zongin kan rak tarlangh chih. Kan naunu damnak tlamtling a hmuhnak hnga thlacamnak in bawm cio hna usih.

Leave a Reply