Kan Miphun Kan Damlonak Phun 4, Rel Ve Hrim

Chin News

Kan Miphun Kan Damlonak Phun 4

Image result for beer

Mah ca hi mirang ca in tial ka timh na in mi phundang an kan theihawk ah aa tlak deuhlo mi aa tel ca ah Laica in ka tial. Catialtu

Kan hnulei February thlathawk ah ramchung/ ramleng kan Krihfa lei hruaitu hna i tonnak Thailand ram Pattaya khua ah rili pawng ah an ngei i, cu ah cun Thailand um ka si ca ah an sin ah ka va i tel kho ve. Minung 42 tluk an ra i, ramchung in kan upa (Biaknak lei ah cun kan pa le tak tak an si hna) 14 an i tel kho. Kan zapi a ra kho hi ram 13 in kan si. Hi kong hi ahotal nih an tial te hnga maw tiah ka hngak pah lengmang i, an mah kan Saya te nih an tial ah aa dawh bik hnga ka ti i, an tial lo caah cu cu kaa um pi kho ti lo i, ka vun tial ve nak a si.

Thildang tampilak ah kan miphun damlonak phun 4 identify an tuah mi a um i, cu cu zeitindah kan dam ter lai? a dam kho tah kan si maw? (Chimduh mi cu taksa zawtnak va si sehlaw, a dam khoti lo mi cancer bantuk hna a si cang maw?), a damnak si a um maw? kan pa le an lung re a thei ko. Hi ti kan damlo buu in kan kal chih leng mang ah cun, kan taksa, kan thlarau zong rawhralhnak a phan lai. Nizannai hrawng ah Lai Forum, Chinland, YCCF hna hi kei kaa telnak biaruahnak buu an si i, cu i kan ceih bik mi issues hna cu, a cunglei ka chim mi kan damlonak hna he hin aa pehtlai mi lawng te an si. Cu hna cu pakhat hnu pakhat in vun zoh uh sih:

1. Zuu kan ding tuk

 

Zuu nih hin kan miphun a thah cuahmah ko. Mual a kan phoh cuahmah ko. Kan ngamdamnak a tumchuk ter cuahmah ko. Mah pumpak lawng si lo in, chungkhar a vun hliam, Krihfa buu a vun hnor, miphun mual a vun phoh.. Ramkip kan khuasaknak ah kan ton mi social problems vialte hi Zuu deuh a si. Kan ral nganbik pakhat le a kan dam ter lo tu thil pakhat ah ruah a si.

2. Lih chim

Kan ram thilsining ruang ah zei mawcan ah cun kan duh na lo in Lih chim hi a hau ton. Sihmanhsehlaw, cu kan lihchim cu kan ziaza bantuk a si cang. Zeimawcan ah cun kan mah chimmi lihbia kha kan mah zong nih kan i zumhcan a um pah tik ah cun, a zual ngai ngai mi kan si cang. Kan pa Rev. Dr. Stephen Hre Kio nih “hi kong ah Pathian sin ah thla voitam nawn ka cam cang! Pathian kan ngaithiam ko. Kan si a fah tuk ca ah le kan ram umtu thatlo ruang ah a si ko” ka ti a ti. Sihmanhsehlaw, USA, Canada, Australia hna le Europe kan phak hnu zong ah kan chim lengmang theu rih ca ah, a poi tuk ka ti a ti. Tax kong ah, chungkhar i auhnak kong ah, social welfare kong ah etc..a lak (free) in zeipoh kan duh tuk fawn.

3. Krihfa Buu then:

Image result for church

Buu then nih hin thatnak le chiatnak ti in a chuakpi mi an um ko. Chiatnak a chuahpi mi hi atam deuh tiah an ruah. Cu cu keizong ka pawm ve. Komhleinak in thenlei deuh hi a si cuahmah. Hi hi computer sisehlaw, virus bantuk a si. Kan holh aa dan ruang bik hi chuanlam lak cu a si i, buu then/ krihfa buu thentuk hi thatnak lei cu a si ruam lo. Cun, virus bantuk in a hrik in kan miphun chung ah a vah tik ah a kan damter lo tu a si fawn. Hiti hin maw kan mah siarem ning cio hin kan va um ko hnalai? Coordination, cooperation tah kan ngei kho ti hna lai lo maw?

4. I lomhpinak (Appreciation) kan thiam lo

Kan miphun chung ah mi pakhat nih thiltha atuah kan theih ko bu ah a congoih zia kan thiam lo. Cu lawng hmanh si lo in, kan lei a zang tuk theu thangchiatnak tu ah. Kan kut a rangtuk computer in vun tial awk ah. Kan miphun hna lak ah siseh, kan peng kan khua kan ram ah thangthatawk a tlak mi hna tampi an um i, zei mawcan ah cun a congoih zia kan thiam hna lo ruang ah, an riantuan thathawhnak nak in an tha kan chiatter hna. Kan zatnak pakhat hrim hrim a si ve. Mirang holh in “negative view” a chiatnak lei lawng deuh in thil kan zoh deuh theu rua ti hi a si. Mah zawn lawng kan i ruat deuh hlah maw ti i vun ruah khawh awk te te hna a si pah. Lomhzia a thiam lo mi miphun an kan ti sual lai!

Zeitindah kan damh khawh hna lai?

Kan ram thatlopi lawng le uktu thatlo lawng hi puh rumro lo in, zeitindah kan miphun damnak (healing process) hi kan tuah lai?

Ramleng ah hin Chin miphun nih kan ngeih mi Institution cu kan Krihfa buu lawng hi a si. Ramkip kan phak hnu zong ah hin, zeidang community a si ah, social org. an si ah, political org. a si ah ramdang ah active in kan tuah khawh mi a um lo. Kan phaknak poh ah Krihfa buu tu cu kan ngei hna. Kan thawhlawm zong a thawng ngai cio hna. Ramchung ah hin kan biaknak Krihfa buu dah ti lo cu, Institution dang dirh khawh a si lo. Civil society groups an um kho lo. Social Org. duhpoh in dirh khawh a si lo.

Cu a si ca ah, Krihfa cawnpiaknak ziaza he pehtlai in kan miphun chung ah “Peace and Justice” laiholh in, “Daihnak le dinfelnak” a um khawhnak hnga ding ca ah ramchung ramleng Krihfa buu vialte kan thazang fonh tuah hna uh sih law tiah kan pa le hna cu tuanvo phaw in biakhiahnak an ngei i, Krihfaa buu vialte i sawm khawh chung in sawmdih hna uh sih law, ramchung lei sawmnak cu a ra mi kan pa le hna nih tuanvo la in le ramleng lei Krihfa buu vialte cu Rev. Dr. Stephen Hre Kio, Dr. Chum Awi le Rev. Pa Ni Maung hna nih an kan hrihhruai lai i, a ramkip ramthen kip ah tuanvo laa ding hna thiah riangmang in an kan hliphlau lai i, the First Chin Christian Conference cu Kuala Lumpur, Malaysia (Kan miphun 45,000 khuasaknak) khua ah 2010 November zarhdonghnak ah tuah ding in khua an khan. Chin Christian Fellowship KL cu a dongtu Krihfa buu an si lai i, fellowship vialte he komh in khua an khang cuahmah ti kan hnulei ka kal ah an ka chimh.

Mah kong ka ruah ah Chin miphun pakhat ka sinak in siseh, Krihfa ka si nak in, kaa lawmh tuk ca ah hi hi kaa um pi khawh ti lo ca ah ka tial mi a si. Global Chin Christian Fellowship (GCCF) ti mi hi a min keng ko seh law tiah kan pa Rev. Hre Kio bia cu a ho hmanh nih ell awk an ngei bak lo. First Conference tik ah kan fehter te lai ti a si. Ram 13 in delegates 42 an kai ko na in, mi kan tling lo. Krihfa buu kan tling lo. Denomination kan tling lo. Holh aa theilo mi kan tling lo. Inclusive (zapite telkhawh) a si hrim hrim ahau ti mi kha an policy a si. A lenglei aa tel mi ka si ca ah bia tampi ka chim lo i, a si na in, an biaruahnak cung ah kaa lawm. Pathian ka thangthat.

USA lawng hmanh ah Krihfa buu 80 tluk a um an ti si kaw, Canada ah Krihfa buu 11 tluk kan ngei. Norway, Denmark, Germany, UK, The Netherland le Australia, New Zealand, India, Malaysia, Singapore, Korea/ Japan ???

Kan thazang aa fun tak ah cun kan miphun a damlonak (acung ka chim mi pin ah kan sifah, kan harnak, etc..) cu zeimawzat thilrit kan chawn khawh ko lai ti ka ruah. November thla KL kal cu ka nupi le ka fa le he tiah kan i ngeihtuk i kalnak khua kan khang cuahmah ko. Cu bantuk kan miphun ah tuanbia a si mi thil ah kan chungte in aa teltu si cu kan duh ve. Na duh ve theu lai dah! (Victor Biak Lian— Source: Laiforum, YCCF-International, Chinland, MFMB groups.) Ref: Lungrawn

Note: Mah ca hi a sau cangmi si nain atu lio a thar in rak thlah tthan mi a si.

Leave a Reply