Sagaing ramṭhen, Kalaymyo Quarantine Center ah chiahmi Chinmi minung 7 cu zuu an ding i sianginn kutka an hrawh caah thilri hrawh case in taza an cuai hna tiah kan theih.

Upper Chindwin Network hruaitu U Kyaw Thet Win nih, “Ṭuanvo ngeitu cozah zung he i bawm in khumherh (quarantine) nak ah um dingin kan tawlrel. Tazacuaimi hna hi Kalay University ah quarantine lutmi an si i Letpanchaung, Min Hlah, Sanmyo, Pin Taw Oo le Tahan sang in mino pawl an si hna.

“Quarantine Center ah pumpek rian a ṭuanmi mino zong an um. Khumherhmi hna an duh ningin thil tuah piak cu a fawi lo ngaimi a si. Mah hi an duh lo i an lungtling rua lo. Cozah nawl chuahmi Covid-19 zulhphung in kan tuahmi zong a si. An dihlak in Kalay University sianginn ah erhkumh an um si i Chinmi minung 7 cu Kalay University min tazacuai an si hna,”tiah

“Report an tuah hna ning cu a thlithup in an lut chuak, Quarantine center ah an aukhuang i rianṭuanmi pawl hna hnawhnak an pek hna. Cun, khumherh duh loin khua chung ah aa thupmi zong an um. Zawtnak an ngeih sual i an thih sual ahcun a poi tuk dingmi a si.

“Cu caah, a cozah nih biatak tein tawlrel (strict taktak in) dingin Sagaing ramṭhen hruaitu sinah kan hal hnanak a si. Coza rianṭuanmi le khuami hna zong nih a si khawh chungin cozah nih zulhphung a chuahmi zulh hi a biapi ngaimi a si,” tiah U Kyaw Thet Win nih cun a chim chap.

Atu hi ramdang in a rak tlungmi tam deuh cu Kalay University ah khumherh an si hna. Chirhchan- Chin World