Mi vialte coronavirus kong ah lungrethei in um a si lio ah thongthlak a tongmi hna cu zaangfaak ngaingai an si. Tuchun ah thawng an thanhning in Kalaymyo ah cun minung 20 bak cozah nawl chuahmi zulhlo ruang ah thong an thlak cang hna tiah an thanh. Hi bantuk in thong thlakmi hna hi a cozah nih zaan suimilam 10 in zinglei suimilam 4 tiang a ho hmanh a leeng ah nan chuak lai loh tiah April 18 ah khan nawl an chuah. A sinain hi bantuk in a cozah nawl chuahmi a zul lomi hna cu a tu bantuk in an tlaih hna i thong an thlak hna hi a si tiah an chim.

Hi minung 20 an tlaihmi hna hi thlathum chung thong thlak an si lai tiah an chim chih. Kan hnu April 26 ah khan Kalaymyo Township zalampi ah ai chok sawsawhmi minung 12 cu tlaih an si. Cun April 27 zaan suimilam 11 hnu ah khuachung lampi ah ai chok sawsawhmi minung 3 cu an tlaih tthan hna. A thaizaan April 28 zong ah a dang minung 5 cu tlaih tthan an si. An dihlak hin thlathum chung thong thlak an si lai tiah an chim.

Zaan ah mipi himnak caah tiin hngilhlo in pumpeek in rian a ttuantu hna le police officer hna nih an chim chih rihmi cu hi bantuk in nawl a buarmi hna chung ah hin kum tlinglo hngakchia zong tampi an um tiah an chim chih. Coronavirus in mipi kan him khawhnak hnga a ho paoh nih hruaitu hna chimning in nun khawh hi kan i zuam cio awk a si. Ref: Zalen