Kalaymyo Taungzalatt ah a ummi Success Private High School siangngakchia hna nih nizaan March 2,2020 ah Laitlang le Kalay pengah a mi harsa minung 7 sinah bawmhnak an pek hna tiah kan theih. Lawmh a um tuk hringhran thil lianngan thil ttha taktak an tuah.

Hi bawmhnak an pekmi hi tangka fangin a si i October thla in zarhpi zing pumhnak i siangngakchia hna pumhnak an ngeihnak i an hmuhmi thawmhlawm chungin atu bantuk bawmhnak an pek hna hi a si. Bawmhnak an pekmi hna khua cu Falam peng Rallang khua, Kalay peng, Hakhalay, Thinzung, Zonuam, Minhla, Aungwa le Taungzalatt hi hna khua ah hin atu bantuk bawmhnak an pek hna hi a si.

Success Private High School i Sayakyi Mang No Zik niha chimmi cu” Siangngakchia hna chungin nanmah le nan khua cio ah bawmhnak ding dirhmun ah dirmi hna min rak pe hna uh tiah kan ti hna hi khua pakhat ah minung 2 report a pemi zong an um. Asinain an dirhmun kan hlathlai hna tikah cawmkengtu ngei lo, Khrihfabu nih a cawm chawmmi tibantuk deuh an si hna. Bawmhnak kan pekmi hna phaisa hi a tampi cu a silo nain fangcang tunkhat maw, siloah chiti le cite voikhat cawknak menmen ti khi a si ko” tiah a chim.

Success Private High School nih bawmhnak an pekmi hna hi mi pakhat ah 55,000 cio an pek hna i ngakngakchia minung 12 hna nih anmah hrimhrim kal in cu hi bawmhnak hi an pek hna. Success Private High School nih kum 2015 kum zongah Kalaymyo i ti a ngan lioah N. Thayakung khua ah bawmhnak an pek bal cang hna i cun Baibal sianginn ah hibantuk ah le a dangdang ah bawmhnak an pek tawn hna. Credit: Cirhti