Chinram ca zong ah atu dirhmun cun nikhat hnu nikhat in a him chin lengmang ti lo ti khawh si cang. A ruang cu vawleipi nih a buaipi mi pulrai zawtnak “Covid-19” ruangah hin si. Coronavirus zawtnak cu kan hnu kum December thla dongh lai te ah China ram in ai thawk mi a si i, atu ahcun vawleicung ah buaipi bikmi le ttih bikmi zawtnak ah aa cang. Atu ah minung ting tampi nih zawtnak an ngei i, tampi nunnak a liam cang.

Hi zawtnak cu tlawmpal a vun i ning deuh tiah daithlang i an um sual bak ahcun ruahlo piin mittthep kar ah zawtnak a hung karh tthan lengmang. Kawlram zong tlawmpal a hung reh deuh tiah zeimawzat mipi tonpumhnak an on nain second Covid-19 a karh than caah siangin zong an on mi an khar ter tthan hna.

Nizan Nov 15.2020 ah khan kan Laimi/Chinmi khua bantuk ah ruah mi Kalay ah Covid-19 zawtnak thar minung 11 an hmuh chap hna tiah IPRD Kalay nih thawngthanhnak an tuah. Kalay ah Covid-19 zawtnak in a zawmi minung pathum cu nizan ah khan damnak an hmuh ve caah sizung in an lawiter hna tiah theih a si.

Kalay ahhin Covid-19 zawtnak ngeimi dihlak hi minung 40 an si tiah IPRD Kalay nih an an langhter. Nihin tiangah Kalay khua chung ah Covid-19 zawtnak an hmuh mi dihlak hi minung 141 an si. Mah chung ah minung 4 nih damnak an hmuh cang i, a dang test result tuah lio mi hi minung 51 an um tiah theih a si. Laaknak: IPRD Kalay