Kalay Civil Army (KCA) an dirhnak a ruang an phuan cang upat lo awk an ṭha lo
Zeiruangah dah Kalay Civil Army hi an dirh timi kong he pehtlai in KCA hruaitu pakhat nih chim fiannak a ngeih. Ahohmanh nihlawh ngeiin a ṭuanmi an um lo i hramhram in i forhnak zong a um lo tiah Kalay Civil Army hruaitu pakhat nih hrilhfiahnak a ngeih hi a si.
Kalay Civil Army (KCA) hruaitu pakhat nih a chimmi cu,” Ralkap uknak duh loin lamzawhnak le duhlonak langhter kan ngei i hriamnam thazaang in mipi ṭhenṭhek dih kan si i Taphik sakhan timi mipi tanhhmun khuarnak timi tiang a chuah phahnak hi a si. Cucaah ralkap nih duh an sian lo bu in le ralkal dohkalh in a si khawhnak lamkip in ralkap duhnak kan pe zulh lai i duhlonak lamzawh a tu mipi hna cu a si khawh chungin kan runven hna lai ti hi a si.
“Kan khua, kan ram ah ralkap uknak kan duh lo timi langhternak a si i khuapi dang zongah anmah le ti khawhning cio in tuah a si. Cucu kannih Kalaymyo zongah kan si khawh chungin ralkap uknak kan do ve timi langhternak bik cu a si. KCA cu CRPH nih a onh cang bangin mah le mah humhimnak le runvennak caah ralthuam tlai phu kan dirhmi a si i, zohkhenhtu (thlopbultu), thawngzamhtu, ti le rawl ei ṭuanvo latu tibantuk hna zong KCA chungah a dang tein kan ngei fawn hna. Cu i ka zahte in kan i funtomnak bik cu KCA ahhin a si.
“KCA cu a hlan ah phu hmetete a rak um cia cangmi pawl kan i komhsuat khi a si ko. KCA kan dirhnak a ruang bikmi cu kan himnak caah ṭuanvolatu dingah a si. KCA ah phu 10 renglo kan i funtom cang i cu bantukin kan i funtom tikah ramdang in Kalay caah bawmhnak a lut lai timi zong um ahcun buainak zeihmanh a um ti lo. Ahlan ahcun khoika dah kuat dingin timi a thei lomi an rak um nain, atu ahcun KCA dirh a si cang caah thil zong a sining a kal kho cang i a felfai kho dih cang.
“Kan lakah ahohmanh nihlawh (thlahlawh) ngei in rianṭuanmi kan um lo i hramhram in fial ruangah a ṭuanmi zong an um lo. Kanmah pumpak biachahnak in le pumpeknak in a ṭuanmi kan si tikah zeihmanh harnak nganpi zong kan hmaiah um hmanh sehlaw a phahchihmi kan si caah, cucu kan ṭhawnnak bik aruang pakhat cu a si,”tiah KCA hruaitu pakhat nih a chim.
Biakilh: KCA an dirhnak aruang a si caah, na hawi le sinah Share rak tuah ve. KCA hi biatak tein, nunnak pek in ralkap a dohmi a si i anmah chungin nunnak a pekmi a nunnak a liam cangmi zong an um cang.
About Post Author
