Kahdohnak Thawngthar: PDF-Kalay nih Ralhrangbu Mawtaw Puak Lakin An Kah. September 8 zaan suimilam 7 hrawngah Kalay peng leiah thlang lei in Kalaymyo lei ah thil phorh mawtaw private car cheukhat he cawh in a rak kai mi ralhrangbu mawtaw hna cu PDF kalay hna nih bomb in puah an si tiah Kalay PDF nih an thanh. Ralhrangbu mawtaw hna hi Thauhkyat le Tharyarkung kar ah PDF – Kalay nih bomb in an puah hna hnuah meithal ngan, meithal hme in an kah chih caah ralhrang hna hi tam an thi lai tiah zumh a si.

Ralhrang hna hi nizaan zaanlei ah Kyanta khua ah an lut i, inn 9 mei in an khangh pinah Donwe khua ah hawi a banglo mi pakhat le khuami 2 hna cu zaangfahnak tel bak lo in an thah hba hnuah tiva hor ah an hlonh hna tiah theih a si. September 7 zongah Kalaymyo thlanglei Kyaukphu le Donwe khua kar ah ralhrangbu hna cu Kalay PDF nih bomb in an puah hna ruangah ralhrang 4 an thi, 10 leng an i hliam tiah theih a si. PDF-Kalay nih ralhrangbu a dongh tiang doh kan timh. Mipi zong nih PDF he a si khawhnak lam in tangti dingin PDF Kalay nih thawng an thanh.

Thawngdang Mizoram legislative assembly session ngei lo mi ah Kawlram buai ruangah Mizoram ah a rak i dor mi ralzaam hna kong cu ceih a si i, cozah nih a chinchiah ningah atu Mizoram chungah a um lio mi ralzaam hi 9,434 an si tiah theih a si. Mizoram home minister Pu Lal chamliana nih a chim ningah August 28 tiang Mizoram chungah a rak lut mi vialte hi 10,229 an si. Mah chungin an ram ah a kir than mi le ka dangah a kal mi an um atu a um mi cazin hi 94,34 an si.

Ralzaam hna hi Mizoram district dangdang ah a um mi an si i, a cheu cu an chungle khat sin ah an um hna. A cheu cu khua/veng nih an um nak hmun an sak piak hna. Mah hna zohkhenhnak dingah Mizoram cozah nih rupees sing 30 an pek cang. Covid-19 he pehtlaihin ralzaam covid zawtnak a ngei mi hna hi a hleikhun in chinchiah an si lo caah ralzaam hna zawtnak a ngei mi hi fiangfai in chim khawh a si lo tiah a chim. Covid-19 zawtnak lak ah kan himtlan khawhnak caah tiin Mizoram cozah nih ralzaam hna cu ngandamnak lei zohfelnak le covid-19 sii zong a lakin chunh khawh dingin timhtuahnak a ngei tiah theih a si.