Kahdohnak Thawngthar: KNDF Nih Ralhrang Ceilak In 5 An Thah Hna Ralhrang Nih Mipi Sawhsawh An Thah Chap Ve Hna. Phekhung peng kahdohnak ah ralhrang lei in minung 5 an thi, cycle in a kal mi mipi lei minung 2 cu ralhrang nih a ruang um lo in an thah hna. Phe khung peng Poechay khua ah ralhrang phu le Phekhung um KNDF kar kahdohnak ah ralhrang lei in minung 5 an thi. Cycle in a kal lio mi khuachung mi minung 2 cu ralhrang phu hna nih a ruang um lo in an thah hna tiah KNDF nih cathanh a chuah.

Hramhram nawlngeihnak la tu ralhrang phu hna le Phekhung um KNDF battalion le mipi vengtu phu kar ah September 8, zinglei suimilam 9:00 ah kaphnih kar kahdohnak a chuak minutes 25 hrawng rau tiang an i kap tiah theih a si. Hramhram nawlngeihnak la tu ralhrang phu lei in minung 5 an thi. Cu kahdohnak a dih hnu ah ralhrang phu hna nih cycle mawngh in akal mi khuami minung 2 cu a ruang um lo in an thah hna tiah KNDF nih a thanh.

September 7 tu zaan lei suimilam 6:00 hrawngah khan Demawhsu peng palik sakhan ah kaphnih kar kahdohnak a chuak cu kahdohnak ah cun suimilam 2:00 leng an rau tiah theih a si. Ralhrang phu lei in a thi mi an tam, KNDF lei in hliamhnak a um lo nain ralhrang phu hna an minung thazaang tampi nih umhmun an khuar caah Demawhsu palik sakhan cu lak khawh a si lo tiah KNDF lei nih cun an chim chap. KNDF nih tlangcung hriamtlai phu hna i fonh in Kayinni ramkulh ramkulh ning in ralhrang phu hna cu kan doh lai tiah nihin September 8 ah KNDF nih cathanh ah a langhter.