Kachin Pastor Pa Caah Ṭihnung Ngaingai Asi Cang Kawl Ralkap An Ṭhu Sawhsawh Ve Ti Lo

Kachin Baptist Convention (KBC) ih president Rev. Dr. Hkalam Somson cu US President inn White House ah Myanmar Christian temtuar ning kan himnak lonak kong a chimmi ah ralkap he pehtlaihnak a um tiah Myanmar ralkap in Myitkyina peng biaceih zung ah pukmah 200 hmang in August 26 ah case an tuah piak tiah theih asi.

Biaknak lei palbet tongtu Myanmar telhin vawlei cung ram 17 cun 2019 July 17 ah US President Donald Trump cu tonnak an ngeihnak ahcun Rev. Dr. Hkalam Somson cu Kachin pastor pahnih zong an tel ve i Rev. Dr. Hkalam Somson nih cun Myanmar ram ah Khrihfa biaknak ah zalennak a um lonak le kan him lonak kong a chim. Cu i bia a chimnak cu World News Now Facebook Page ah tarlanghmi an hmuh ruangah case tuah dingin nitlak lei ralkap hmunpi i ဒုတိယဗိုလ္မႉးႀကီး Than Htaih in Myitkyina peng biaceih zung ah a an chuahpi tiah theih asi.

Atu tiang cu zung lei nih thawngpang an ka chim rih lo tiah Rev. Dr. Hkalam Somson in a chim. US President Donald Trump sin i bia a chimmi ah ralkap hua in dokalhnak thinlung a um lo zong a chim chih fawn. Rev. Dr. Hkalam Somsonnih President Donald Trump sin i a chimmi chungah Myanmar ram i Christian pawl cu ralkap in faktuk in thleidan an kan tuah, biaknak leiah zalennak/nuhrin covo a um lonak, tlangcung hriamtlai pawl nih cun Myanmar ralkap cu mah le mah humhimnak caah an dohnak kong, American acozah dirhmun in tlangcung mi mi tlawmte cu a dikmi demo federal ngah khawhnak dingin bom a herhning le, American acozah in Myanmar ralkap hruaitu cheukhat cu hremnak a pek ruangah mipi kan lung a tling timi zong a chim chih tiah theih asi. Source: RFA, VOA, MNJ