Ka Ruat! A Caah “Thaizing Khua A Dei Te Lai” Tiin Ruahchannak He Nun Hmanh A Huam Ti Hnga Maw? Ti Hna Ka Ruat

Ka Ruat! Kan farnu kong cu nan phozarh deuhdeuh, ka zaangfak in ka ngeihchiat pi deuhdeuh ve. Zeiruang ko ahdah hi dirhmun a phak i zeikodah a rak ton ti hmanh a fiang rihlo. Kan pale Biaknak hruaitu aa timi, Zatlangbu hruaitu aa timi le State Minister tiang hna nih comment dawhlo tete an hun tial ka hmuh ah ka khuaruah a har ko. Kan media pawl nih hei tiah an rak tlanh cio rih. Facebook hna rak hmang in kan catial le kan comment tete rel ve sehlaw zeidah a lawh hnga mu. A caah “thaizing khua a dei te lai” tiin ruahchannak he nun hmanh a huam ti hnga maw? ti hna ka ruat. An nufa in zei can ko dek an can.

Minung hi kan ithim lomi le kan duhlotukmi dirhmun le sining kan phak caan a tlawmte lo. “Hibatuk dirhmun hi kan phan kholo”, tiin a el ngam ding zong kan silo. Vawleicung pennak nganbik a rak simi Babylon ram Siangpahrang Nebuchadnezzar hmanh cawtum bang hramh a tam caan a phan bal. Egypt ram Siangpahrang Pharaoh inn le chumtual ah duh in a rak tlawngmi, ahnu ah Isreal mi hna sal in a chanchuahtu Moses hmanh thetse ramhar ah tucawng dirhmun a rak phan bal. Joseph Jospeh kan timi hmah khur ah hlonh, sal ah zuar, thonginn ah khumhmi pa dirhmun a rak phan. Kan biakmi Jesuh hmanh “vailam ah khenhchih uh” tiin rak auh hnawh a rak si. Laimi tampi nunthlengtu kan pale phungchimthiam pipi zong zalamtlang ah a rak rilmi an rak tampi, anmah lila nih tehte an khan than.

Kum 40 chung Libya ram uktuk Muammar Gaddafi hmanh zalamtlang ah rawt in a hruaimi mipi lila nih zohchia ngai in a nunnak an lak, hawi thih hmanh in a thiloh. Vawleipi buaipitu pawhpi bang a rak hrangmi Adolf Hitler hmanh a thih ah a ruak hlohhlak asi. Kawlram kum saupi uktu General Ne Win hmanh a thih lio ah a ruak kaitu le humtu an rak umlo. An rak bawi lio le nawl an rak ngeih lio, an tlamtlin lio cio ahcun cubang an rak iruat hrimhrim lailo.

Minung hi thaizing zeidah ka ton hnga i, zeidah ka can lai ti kan ihngallo. Mui padap ah a tlawng i, thaizing timi niceu dawh hngak in ruahchannak he hmai ah a fong ciomi kan si. Beidonghnak hna nih a hun kan phak i, rawl ei tidin awk hmanh ngeihlo, idornak inn le lo ngeihlo caan zong nih a kan phak khawh cio fawn. A mithmai ah a mirh len ko buin chunglei in a tap thluamahmi kan tampi, suits le necktie he stal ngangin ithuamh nain aruang ruangah thinlung hmape he a tlawngmi an tampi ko fawh.

Cu caah minung pakhatkhat kan thangchiat, kan mawhchiat, kan ceihphai hna hlan ah sau deuh khua kan tuak cio a hau ve. Kut dong 2 in facebook ah catial cu a fawite ko nain, a hnu in a ra dingmi le a rak ingtu minu/mipa nih “zeitlukin an lungfah lai le an intuar lai” ti zong kan ruah pah ve cu a hau ko. Laknak: Ram Tin Thei