Democrats party hruaitu hna nih Vice President Mike Pence cu 25th Amendment timi phung hmang in President Donald Trump cu a rian phuah an forh. Asinain President Mike Pence le Republican hruaitu hna nih an duh lai zumh a um lo. 25th Amendment timi cu a tawinak in President nih a rian a tuan kho ti lo tin Vice President nih chan khawhnak phung a si.

FBI nih hlat-hlainak an tuahmi report an pekning ah 25th Amendment hmang in President Donald Trump an thlak sual ahcun ramchung ah meithal he sandahpiah nak a chuak lai tiah democrats hruaitu pawl cu ralrinnak an pek hna. US state 50 i an khualipi cio ah meithal he lamzawhhnak a chuah khawh caah 25th Amendment hman lo dingah ralrinnak an pek hna.

President Donald Trump a dirkamhtu cheukhat nih meithlak he lamzawhnak tuah dingah timhlamnak an ngei men lai tiah an zumh. FBI nih an chimnak ah January 17 in January 20 kar ah hin US state 50 in President Trump a dirkamhtu hna cu meithal he Washington D.C an phan kho tiah an chim.

President Trump cu democrats pawl nih an control mi hluttaw, House ah impeachment tuah ding in an chuahpi cang. House nih an pass lai i Senate ah an kuat lai. Senate ah senator minung 100 an um. Republican le Democrats minung 50 veve an si. Senator Cheu thum, cheu hnih hnatlaknak lawng in President cu phuah khawh a si. Cucaah democrats nih Senate an phak pi zongah President Trump an phuah khawhnak ding lam a um lo.

Senate meting cu January 19 lawng i thawk ding a si caah President a dinh caan le Joe Biden Inauguration a tuah ding ni cu 21 a si. Cucaah Senate zong nih impeachment tuah caan an ngei hlei ti lo. Cucaah democrat nih ram an dawt ahcun buai lo tein an kalpi a hau. President Trump zong nih dai tein ka chuak lai tiah a ti cangmi a si. Source: Salai Lairamthang

Thawngpang dang ral rel chih: Monday zanlei ahkhan, Mike Pence le Trump cu buainak a chuah hnu ah a voikhatnak an itong. Trump le Pence cu Kum 4 chung nainiam tein rian an ṭuan ṭi hnu ah zohchia in an iṭhen ko cang.

TRUMP nih Pence cu phunghrampi buar in Electoral colleges result cu “objection” tuah dingin a fial nain, Pence nih a al caah Mipi theih in Trump nih a thangchiat pinah a nunnak he pehtlaihmi security kong ah him lo ngai in, Capitol building in zaam dirhmun a phak ve tikah, Trump cungah a lung a fak ngai tiah amah he nainiam nih an chim.

Pence cu, Democratic Party nih 25 amendment hmang in Trump cu a rian in ngolter ding hi an fial nain, a al hna. Cun, Jan 20 hlan chung, an rian a tangmi pawl ṭhate in ṭuan aa timh pinah Joe Bidden Inauguration zong ah chuah aa timh tiah an langhter chih. President Trump belte cu “Joe Bidden Inauguration ah ka chuak lai lo” tiah a chim i, US tuanbia ah Kum 150 hnu ah Inauguration a chuak lomi President a si lai tiah NBC nih an langhter.

Jan 6 sandahpiah lio ah hliam hma in a nunnak a liammi, Capitol Police officer chungkhar cu Mike Pence nih a va leng hna. Asinain, Trump tu nihcun a chawnhbiak rih hna lo tiah nbc news nih a langhter rih. TRUMP hi a political career zoh tikah thingkung kai a thiam ngai nain a ṭum lei a thiam ti lomi ka lawhter ngai.

Teinak hmuhnak ahcun Mipi thinlung a lak khawh ngai ko nain, sungh a thiam ti lomi nih a thlak ṭhan. Politics a khel ning zoh tthan tikah, Republican Party in Primary a rak icuh lio ah anmah Republican primary election system hrim hi “Rigged” a rak ti cang. Mah lio ahkhan rak sungh sehlaw, a cohlang lai lo. “Rigged” a si tiah Independent in a rak icuh lai i, Republican Party cu a khuai/a ṭhen lai. Asinain Republican party in icuh ding teinak a hmu ko caah, a dai.

2016 ah Hillary he President an icuh lio ahkhan “election is rigged” a ti lengmang thiam. Rak sungh sual sehlaw, Mipi vote cun ka tei nain Rigged/fir/ in a ka tei a ti lai ti kha, a campaign message in ah rak ifiang cia. Cucaah, Presidential Debate kip ah Election Result hi na cohlang lai maw? Tiah an rak hal lengmang nak kha a si.

2020 election ah Joe Bidden he an izuam ṭhan i, Election is rigged/stolen tiah a cohlang duh lo. Legal te in challenge khawhnak vialte ahcun, a challenge dih nain, a tei hlei lo. A donghnak, House le Senate Joint Meeting ah a Vice President tiang phunghrampi buar in Electoral college result objection tuah ding a fial. Sungh a thiam ti lo caah, a donghnak ahcun, amah he nainiam bik, A Vice President Mike Pence he lamdang zulh in an political tuanbia cu an dih ko.

“2020 election ah kan sungh zong ah 2024 ah izuam ṭhan ding caan tha a ra ṭhan lai” tiah ruah khawh ding a si nain, sungh duh lo ruang ah minung 4 nunnak a lak in a liam i, amah dirpitu nih meithal he sandah piah an itimh rih ti a si fawn tikah, a herh loin minung nunnak tampi a liam chap rih sual hnga maw tiah ruah a rem lo taktak khi a si ko. Apoi e! Source: Zasang Cinzah

______

Copyright © Chin World News Evening