Jesuh Khrih Kongah UPC Zumhnak- Van Nun

Theihtlei

Jesuh Khrih Kongah UPC Zumhnak- Van Nun

Image result for upc khrihfabu

Kristian zumhnak le cawnpiaknak ah Jesuh Khrih kong hi a muru le chungril taktak a si. Phun dang kan chim ahcun, Jesuh hi rak um hlah sehlaw, vawlei ah kristian zumhnak hi a um lo men lai. Sihmanhsehlaw, minung ruahning, duhning le hmuhning ai dan cio bang – Jesuh Khrih kongah kan cohlanning, zumhning le cawnpiakning ai dang cio. Ai ralkah ciomi zumhnak le cawnpiaknak hoih in, tahnak le cuaithlainak kan tuah si ahcun, phu pakhat nih an tlaihtleng cherhchan in phu dang cu an zumhnak le cawnpiaknak hi ‘ai palh silole a chiami si’ tbk zong ti caan um ko lai. Khuaruahhar ding si lo, politics zongah, an dirpimi policy cio hoih in – na dik, na palh tiah hehchet i-dohdal, i-soisel le i-mawhchiat si ko.

Minung thlarau khamhnak caah muru taktak simi cu Jesuh Khrih konglam, tuahmi le cawnpiaknak hi a si. Nain, biaknak le zumtu tampi cu Jesuh Khrih zumhning ah kan i-dang cio hna. Muslim nih Jesuh cu profet pakhat in an zumh. Jehovah’s Witness nih Jesuh cu Pathian fapa in an zumh (Pa Pathian he an sining ai khat tiah an zum lo). Arianism nih Jesuh hi Pathian sermi in an zumh (Sertu Pathian tluk a si lo). Cun, kristian chungah milu tam deuh nih Jesuh cu thumkomh Pathian ah pakhat in an zumh (Pa Pathian, Fapa Pathian, Thiang Thlara Pathian). Cu lioah, UPC nih Jesuh Khrih cu Sertu Pathian sining le langhning tampi ngei in an zumh.

A fiangmi cu Jesuh Khrih hi vawlei ah minung le zumtu nih phunphun hoih cio in zumh a si. Cu bantuk si caah, capar, cauk le cawnpiaknak tbk ah ralkah in soiselnak, dohdalnak le biadohnak cu a um hrimhrim awk a si ko. Jesuh kongah mahle dirhmun le zumhnak cio kha zalong in chim, ttial le langhter cio ding si ko. Pumpak cio nih zumh awktlak le cohlan phu si tiah ruahmi kha – cohlan in nunpi ding a si. Tutan ah ka van langhter duhmi cu UPC nih Jesuh zumhnak kongah muru ngai si vemi Bible caang pali hi an si:

1) Abraham he kan i-tong – Jesuh nih Judahmi sinah a chimmi cu, ‘Nan pu Abraham nih khan kan i hmuh lai kha a rak i ngaih ngaingai, a hmuh taktak i a rak i lawm’ (John 8:56) tihi a si. Vawlei ah Jesuh minung taksa sinak cun Abraham he an i-tong lo, nain biakam hlun Pathian in Judahmi sin ai rak langhnak in an rak i-ton hi a si.
2) Moses nih ka kong ttial – Jesuh nih Judahmi sin tthiamtthiam ah a chimmi cu, ‘Moses kha rak zum taktak u law cu, keimah hi nan ka zumh ko hnga, zeicahtiah amah nih keimah kong hi pei a rak ṭial cu’ (John 5:46) tihi a si. Moses ttialmi cauk hi Jesuh kong a si ahcun, Jesuh cu Sertu Pathian a si ko hnga lo maw?
3) Moses, profet le Salm cauk nih ka kong an ttial – Jesuh nih a zultu hna sinah a chimmi cu, ‘Moses Phungbia chung le profet hna nih an ṭialmi chung le Salm chungah keimah kong an rak ṭialmi vialte cu a tlin dih awk a si’ (Luke 24:44) tihi a si. Bible nih a thawknak in donghnak tiang Jesuh kong a rak ttial tinak si ko hnga lo maw?
4) Cathiang dihlak nih ka kong ttial – Jesuh nih Judahmi sinah a chimmi cu, ‘Cathiang chung kha ṭha tein nan kawl, cu nan kawl cu, Cathiang chungah cun zungzal nunnak kan hmuh hmanh hnga maw tiah ruahnak nan ngeih caah a si; asinain Cathiang nih an dihlak in an chimmi cu, keimah kong a si ko. Sihmanhsehlaw nunnak ngeih awkah keimah sin rat tu cu nan duh lo’ (John 5:39-40) tihi a si.

A cunglei langhtermi Jesuh zumhnak phunphun nih minung le zumtu cio kan i-dannak a langhter. Cun, Jesuh nih Amah kong chimmi nih a langhtermi cu Bible hi Jesuh kong cauk a rak si tihi si. Pumpak cio nih Jesuh cu duhning paoh in zumh khawh a si – tck ah, nuncan cawnpiaktu le hruaitu ttha tbk tiang lawng in Jesuh hi zumh khawh a si. UPC nihcun a cunglei langhtermi Bible caang le dangdang cherhchan in Sertu Pathian (sining le langhning tampimi) in zumh a si. Ref. Gascoigne, Bamber. HistoryWorld. From 2001, ongoing. http://www.historyworld.net ‘History of Arianism’ Got Questions (2019). What is Arianism? (gotquestions.org)

Ref: Van Nun

Leave a Reply