JESUH NA ZUMH I KHRIHFA NA SI KO AH ZIAH HITI NA UM NE?

Zeicadah Jesuh kan zumh i kan thangthat kan ti ko nain kan nun ai thlen hlei lo? Zeicadah hnangamnak kan ngeih hlei lo? Zeicadah tukforhnak kan tei hlei lo? Zeicadah dawtnak nun kan ngeih hlei lo? Zeicadah kan hrin tthan hlei lo? Jesuh kan zumh nIng a hman lo caah a si. Kan Jesuh zumh hi Jesuh zumh a si lo caah a si.

1. JESUH ZUMH CU JESUH COHLAN A SI

Jesuh zumh cu Jesuh kha cohlan a si. Jesuh kha i laak a si. Jesuh cohlan cu Jesuh kha kan nunnak ah umnak hmun peek kha a si. Jesuh kha kan nunnak i umnak hmun peek cu Jesuh he umtti, khuasak tti kha a si. Cucaah Jesuh na cohlan lawnglawng ah Jesuh kha na zumh cu a si. Zumhnak le cohlannak cu tthen awk an ttha lo, an kal tti. Jesuh ka zum a ti i Jesuh nih a um pi lomi nan tam tuk.

2. JESUH ZUMH CU PATHIAN I HNGATCHAN KHI A SI

Jesuh zumhcu Pathian i bochan a si. Pathian i bochan cu Pathian i hngatchan a si. Pathian i hngatchan cu na sining vilate, na buainak vialte le na harsatnak vialte kha Pathian sin i peekchanh kha a si. Zumhnak le bochannak cu tthen awk an ttha lo. An kal tti. “Jesuh cu ka zumh ko nain ka lungre a thei” ti a tam tuk.

3. JESUH ZUMTU SI CU JESUH ZULTU SI KHA A SI

Jesuh zumh cu a nawl ngaih asi, a nawlngaih cu a chimmi tuah asi, a chimmi tuah cu a hnuzulh asi. Zumtu ttha pohpoh cu zultu ttha an si ve. Zumtu sinak le zultu sinak cu tthen awk a ttha lomi a si. “Jesuh cu ka zumh ko nain zultu sinak ahcun kai tel kho lo” ti a tam tuk.

4. JESUH ZUMTU SI CU JESUH SIN I NUN I PEEK KHA A SI

Jesuh ka zumh ti cu Jesuh kha ka nunnak ka peek tinak a si. Jesuh kha ka nunnak ka peek ti cu Jesuh nih a duh ning poh in ka nunnak hi hmang cang seh tinak a si. Jesuh nih ka nunnak hi a duhning poh in hmang cang seh ti cu Jesuh ta ka si cang tinak a si. Jesuh ta ka si cang ti cu Jesuh sal ka si tinak a si. Cucaah Zumtu sinak le Khrih sal sinak cu tthen khawh lomi an si. “Jesuh ka zum a ti mi Sehtal sal nan tam tuk.

5. JESUH KA ZUMH TI CU A BIA NINGIN NUN A SI

Jesuh ka zumh ti cu a cawnpiaknak ka zumh tinak a si. A cawnpiaknak ka zumh ti cu keimah ruahnak le hmuhning in ka zum lo tinak a si. Ka ruahnak le ka pom ning sawhsawh in ka zum lo ti cu Baibal ningin ka zumh tinak a si. Cucaah Jesuh zumh le Baibal ning i nun cu tthen awk a ttha lomi an si. Jesuh ka zum a ti i Jesuh chim lo ning i Pathian a bia mi le thla a cammi nan tam tuk.

6. JESUH KA ZUMH TI CU KA HRIN TTHAN TINAK A SI

Jesuh ka zumh ti cu Pathian fa ka si cang tinak a si. Pathanfa ka si cang ti cu Pathian inchungkhar ah a thar hrin ka si tinak a si. Pathian inchungkhar ah hrin ka si ti cu Thiang Thlarau in hrin ka si tinak a si. Cucaah Jesuh zumhnak le hrintthannak cu tthen khawhmi a si lo. Jesuh cu ka zumh nain ka hrin tthan lo ti a tam tuk. Hrin tthan ttung lo Jesuh zumh cu Sehtam uar ci te a si.

Cucaah cohlannak ai tel lo buin Jesuh kan zumhmi, Pathian bochannak tel lo in Jesuh kan zumhmi, zultu sinak tel lo in Jesuh kan zumhmi, nun i peeknak tel lo i Jesuh kan zumhmi le Jesuh cawnpiaknak zul lo in Jesuh kan zumhmi zumhnak vialte cu a thimi zumhnak a si caah Jesuh kan zumhmi nih kan nunnak zeihmanh thlennak a ser lomi a si. Zeican saudah Jesuh nan zumh cang timi nakin Jesuh hi zeitindah nan zumh timi hi a bia deuh!

Credit: Dr. Aung Myint Thang