Jesuh Chuah I Mifim Hna Kha Zeidah An Fim Hlei Nak Si? (Aruang 10 Mihrut Nih Rel Ding

Chin News

JESUH CHUAH I MIFIM HNA KHA ZEIDAH AN FIM HLEI NAK ASI?
(Aruang 10 Mihrut nih rel ding)

Image result for Jesuh chuah nak

Hi mifim hna hi America i PhD degree a lami an si lo. Thlapa cung kaimi an si lo. Scientist an si lo. Anmah chan lio ah minung lei in fimnak cu an ngeih pah ttheu lai. Asinain kan ruahnak sawhsawh lawng asi. Baibal chung ah an fimnak kong tu kan i ruah hna lai.

1. Khuaruahhar arfi an hmuh in Messiah a chuah cang ti an hngalh khawh: June thla ah ruah a sur lai ti na hngalh. Zeitindah na hngalh khawh? Kum chiarte June thla ah ruah a sur caah asi. Siangpahrang lianngan chuah poh ahhin hi arfi hi rak lang lengmang selaw mifim an si hnga lo. Vawlei serka in vawlei dongh tiang ah voikhat lawng a lang mi arfi asi. Cucaah hi arfi kong hi cawn khawhmi zong asi lo. Cu arfi an hmuh i Messiah a chuak cang ti an theih khawh. Zeitindah an hngalh khawh? Lev. 24:17 ah Baibal nih a chimchungmi an hngalh caah a si. Baibal an hngalh caah asi. Cucaah Baibal hngalmi hi mifim an si. Baibal hngalmi cu biatak hngalmi an si. Biatak a hngalmi cu khamhmi an si. Scientist na si zongah, bawi na si zongah, mirum na si zongah Baibal na hngal lo, biatak na hngalh lo ahcun mihrut bik na si. Atuah baibal cu na hngal maw?

2. Messiah a chuak cang ti an hngalh lawng asi lo, ton dingin an va kal: Lam hla ngai in Jesuh ton ding ah an va kal. Jesuh umnak hmun an va panh. Jesuh ton a duhmi, Jesuh umnak leiah a kalmi hi Baibal le Pathian nih mifim a timi hna cu an si. Jesuh hmuh ai tim lomi, biakin pumh a hua mi, Jesuh kong theihfian a duh lomi nakin mihhrut deuh an um lo. Na intual i Jesuh kong an chim ko zong i na kal duhlomi kha na hruhnak langhtertu nganbik a si. Na hruh mual an phohtu a si.

3. Cenghngia bantuk Herod hmanh an ton ngam: Herod sin i an phanh ahkhan Herod nih a rak thah khawhmi hna a si. Midang vun chim lo Herod nihhin amah fapa taktak asimi minung pahnih a thah cang hna. Emperror Augustus nihcun Herod fapa si nakcun Herod vok si a ttha deuh, a him deuh tiah a ti bal. Jesuh hmuh duh ruangah ttihnungmi hmunhma tiang a kal ngammi hi mifim an si. Laimi cheukhat cu ruahsur zong i pumh a ngamh lomi kan tam. Uihrik le fikfa nih an seh hna zongah pumh lo nak ah nan hman.

4. Anfi lam hruainak an zul: Jesuh umnak hmun chimtu ding ah Pathian nih lamhruaitu caah a pekmi hna an zulh i cunihcun Jesuh umnak tiang a hruai hna. Cu lamhruaitu arfi cu tthatein an zulh caah Baibal nih mifim a ti hna. Jesuh sinah an hruaitu ding Baibal hi na zulh lawnglawng ah nang zong hi mifim na si lai. Baibal cawnpiaknak a zullomi, Baibal a pomlomi, Baibal acheu a pom i acheu a pomlomi mifim an um lo. Mihrut an si dih.

5. Zisuh an va ton i an biak: Jesuh a tongmi hi mifim bik kan si ko. Jesuh a biami hi mifim bik kan si ko. Jesuh a bia duh lo i, anawl a ngai duh lomi, thluachuah lawnglawng a halmi pawl hi midepde an si. Minung cu Jesuh kan ton i kan biak lawnglawng ah mifim kan si.

6. Jesuh laksawng an pek: Jesuh sinah lunglomhnak tuahsernak in a langhter tu lawnglawng hi mifim an si. Zeitlukin na laam len le na kui len hmanhah na arti da hmanh Jesuh ca i na sian lo ahcun mihrut bik na si tthiamtthiam.

7. Jesuh kha thil man sunglawi laksawng an pek: Jesuh a dawmi taktak le mifimmi nihcun Jesuh kha thil sunglawimi laksawng an pek zungzal. Sui cu thil man fawi a si lo zia nan hngalh dih. Myrr le Frankisen zonghi Izip ram ka um lio ah ka rak cawk bal hna i aman afak taktak. US$ 100 man cu tlawnte lawng asi. Mifim mi nihcun asunglawimi an caan ttha, a ngeihchiah, le an nunnak tiangin Khrih kha laksawng ah an pek tawn. Mihrut nihcun Jesuh kha phaisa 50 ca, 100 ca, 200 ca tibantuk, an thlau sual zong i a pawi lem lomi pawl kha an peek tawn hna. Kain unau pawl!

8. Pathian nih bia a chimh hna: Pathian nih bia a ruahmi minung hi Baibal nih mifim atimi hna an si. Sehtan nih bia a ruah lengmangmi hna hi muhrut diktak cu nan si. Nangteh Pathian nih bia an ruah ve bal maw? Pathian nih Baibal bia hmangin bia an hruah bal maw? Thazaang an pe bal maw? Sehtan lawng nih dah ruahnak an cheuh lengmangmi na si? Asiloah pathian nih bia ka khat an ruah ah, Sehtan nih voi kul hrawng bia an ruahmi na si sual maw?

9. Herod bia nakin Pathian bia a ngeih deuh: Herod nih Messiah cu va tong ulaw, cun ka sinah rak ra tthan uh a ti hna. Asinain Pathian nih Herod tong tilo dingin bia a chimh hna caah Herod bia tu ngai lo in Pathian bia tu an ngaih. Vawlei mifimmi bia nakin Pathian bia ahman deuh le adik deuh i a chia i a ngaimi poh hi Baibal nih mifim a ti hna. Baibal bia nakin scientist bia a zum deuhmi pawl hi baibal nihcun mihrut an ti hna.

10. Jesuh an ton hnu cun lam dang in an kal cang: Baibal nih mifim a ti hna nak araung pakhat cu Jesuh an ton hnucun Jesuh i a ralpa Herod sinah an kal ti lo. Herod an hrial cang. Herod nih hna a hnawk khawh lonak lam in an kal cang. Jesuh kan ton cang e tihnu i Sehtan (Herod) umnak lei i a kal tthanmi cu mihrut an si. Mihrokhrawl an si.

Baibal nih mifim a timi hna cu Pathian nih mifim a timi hna an si. Nangteh Baibal nih mifim an ti ve hnga maw? Mi nih mihrut an in ti ko hmanh ah Pathian nih mifim an timi kha a biapi deuhmi asi. Pathian nih mifim an ti ahcun mifim na si. Credit: Aung Myint Thang

Note: Mah ca hi a sau cangmi si nain a thar in rel duhmi caah rak thlah tthanmi a si.

Leave a Reply