Admin||04 Vaupi 27-2020|| Thawngṭha ngaingai a si. Pathianni zanlei i thanhnak an tuah tthanmi ning in cun Italy le Spain hna ah cun coronavirus ruang ah a thimi an zor ngaingai cang. Italy Civil Protection Agency nih an thanhning in Pathianni suimilam 24 chung ah khan hi zawtnak ruang hi a thimi hi minung 260 ah an zor cang. Hihi March thla thok in nihin tiang ah suimilam 24 chung ah a thimi an tlawmbik ni a si tiah an chim.

Italy hi vawleicung ah coronavirus in a thimi an tam biknak ram a pahnihnak an si. Pakhatnak ah US. Italy ramchung ah coronavirus in a tu tiang ah a thi cangmi hi minung 26,644 bak an tling cang tiah Italy Civil Protection Agency nih an thanh.

Spanish Health Ministry nih Pathianni ah an thanhning in Spain ramchung ah nihin Pathianni i a thimi hi minung 288 an si. Hihi kan hnulei ni 37 in a tu tiang ah nikhat chung ah a thimi an tlawmbik caan a si tiah an chim. Spain ramchung ah hi coronavirus ruang ah nunnak a liam cangmi hi minung 23,190 an tling cang tiah Health Ministry nih an thanh. Spain hi vawleicung ah hi coronavirus in a thimi a tamlei in pathumnak US le Italy changtu an si ve.

Pathianni thok khan Spain ram ah cun hngakchia kum 14 tang cu lengchuah an sianh cang hna. Lockdown an tuah in ni 40 renglo hnu ah a voikhatnak lengchuah an sianh hna a si. Hngakchia kum 14 tang hna cu nikhat ah suimilam 1 chung lengchuah sianh an si cang tiah an chim chih. Ref:ABC News