THIANG THLARAU CU JESUH A SI LO. AA DANGMI (DIFFERENT PERSON) ASI KO. BIBLE AH ZOH HNA USIH. JESUH cu a thawhțhan hnu ah THIANG THLARAU in aa langh timi hi a dik loh. A nun lio hrimhrim ah Thiang Thlarau cu a sin ah a um cang. (1) Jesuh tipil a in lio ah a cungah Thiang Thlarau cu a țum.

John 1:33 “Mi pakhatkhat cungah Thiang Thlarau kha a rung țum i aa fut kha na hmuh tikah, cu pa cu Thiang Thlarau in tipilnak a petu hna ding cu a si ti kha na hngalh lai,’ a ka ti” (Jesuh hi Thiang Thlarau sisehlaw mah le mah cung ahcun țum phung le i fut khawh phung asi lo. Zeitindah nangmah cung ahcun na țum khawh lai i naa fut khawh lai. Cucaahcun Thiang Thlarau cu pumdang (Diffent person) asi ti a fiang. (2) Jesuh cu Tipil a ing hnu ah Thiang Thlarau in a khat i Thlarau nih lam a hruai.

Like 4:1 “Jesuh cu Thiang Thlarau he khat in Jordan tiva khan a ra kir i Thlarau nih ramcar chungah khan a kalpi” (Jesuh hi Thiang Thlarau sisehlaw Mah Bible hi “JESUH cu JESUH he khat in Jordan tiva khan a ra kir i JESUH nih ramcar chungah a hruai” ti ding a si hnga i sullam a ngei lomi asi lai) Mah le mah lam aa hruai hnga. Mah le mah cu i kalpi in lam i hruai khawh asi lo. Cucaahcun Thiang Thlarau cu Pumdang (Different Person) asi hrimhrim nak cu el awk a țha lo..

(3) Pathian nih Jesuh cu Thlarau kha tling tein a pek. Tling tein timihi (without Limit) asi. Limit ngei loin a thih hlan tiang a pek i Thlarau nih a um pi tinak asi.”. John 3:34 “Pathian nih a thlahmipa kha a Thlarau cu tling tein (Without Limit) a pek caah Pathian bia cu a chim” (PATHIAN nih A THLAHMI cu JESUH asi. JESUH cu THIANG THLARAU a pek a ti. Van Zoh ulaw Pa le Fapa le Thiang Thlarau cu hmun khat te ah an lang ko hih mu. Jesuh hi Thiang Thlarau sisehlaw mah Binle hi “JESUH nih A Thlahmi pa Jesuh cu Jesuh a pek ti ding asi hnga i sullam umlomi asi hnga) (4) Jesuh Nih Khuaruahhar Thil A Tuahmi le Khuachia A țhawl khawhnak Cu Thiang Thlarau Thawngin Asi.

Matt 12:28 “Nan timi hi a si lo, khuachia țhawl khawhnak a ka petu hi Beelzebul si loin Pathian Thlarau a si i cu nih cun Pathian Pennak cu nan sin a phan cang ti kha a langhter” (Matt 12:28) Lamkaltu 10:38 “Cu thil lianngan cu, zeitindah Pathian nih Nazareth khuami Jesuh kha Thiang Thlarau le țhawnnak a toih i Pathian nih a umpi caah zeitindah khuazakip ah aa chawh i khuachia țhawnnak tangah a ummi vialte a damter hna kha a si” (5) Jesuh cu Thiang Thlarau nih Lawmhnak in a khahter

Luke10:21 “Khi tikah khan Jesuh cu THIANG THLARAU nih lawmhnak in a khahter” (Jesuh cu Thiang Thlarau sisehlaw MAH LE MAH cu Lawmhnak i khahter khawh phung asi lo cu mu. Thian Thlarau nih lawmhnak in a khahter ati caah Thiang Thlarau cu Jesuh asi kho lo) (6) Jesuh cu Thiang Thlarau nih a thawhțhan ter mi a si.

Rom 8:11 “Jesuh kha thihnak in a thotu Pathian Thlarau cu nan chungah a um ahcun…..” (Jesuh hi Thiang Thlarau sisehlaw mah Bible hi. “JESUH kha thihnak in a thotu JESUH cu nan cungah um ko seh tiding khi asi hnga cuh) (7) Khrih Jesuh Cungah Thiang Thlarau Umpinak Cu Prophet bia A Tlingnak Asi

“Bawipa Pathian (JEHOVAH) nih THLARAU in a ka khahter. Sifakmi hna sinah thawng țha phorh awk le lung a kuaimi hna damter awk le sal i a tangmi hna sinah chuahnak thanh awk le thong chung i a ummi hna sinah luatnak thanh awkah a ka thim i a ka thlah” (Isaih 61:1) A Cunglei Bible nih Jesuh cu Thiang Thlarau asi lo ti kha a langhter. Thiang Thlarau cu Pumdang (Different person) a sinak a fiang tuk. Cattialtu: Israel R. Thang