Israel Biathli An Phuan Diam Ai: London ramchung i Arabic holh cathanh pakhat Asharq al-Awsat nih Arab diplomats sin in thawng an theihmi an chimnak ahcun nikum le tu hrawng i Iraq le Syria ram hna i Iran’s Revolutionary Guard Corps hna base dang dang missile hmangin kahnak le drone hmangin dohnak hna hi Israel Air Force (IAF) thil tuahmi vialte a si. IAF nih US le Russia nawlngeitu hna sinin (green signal) hmu in anmah lungtlinnak an lak hmasa hnu in an tuah dihmi a si,”tiah an langhter.

IAF hna nih hin Iraq kan doh an ti lo nain F-35B Lightning II hmangin Baghdad chaklei, Iran pawng, Iran in 70km hla i Iran ralkap hmun hma hna cu missile hmangin an kah tawn i, Syria ramchung i Iran umnak le hriamnam supply petu tiah ruahmi motor zong missile in an kah tawn hi si. A thi mi le hliamtuar zong an um hna. Hi kongah Israel zong nih an i pheh ve lo.

US nih hin Iraq cunglei hi anmah nawlngaihnak tangah an chiah i, US lungtlinnak lo cun Israel zong nih Iraq ramchung zuannak, cun Russia lungtlinnak tel loin Syria ramchungah zuang in tuk dohnak a tuah khawh ding hi zumh si lo. Strait of Hormuz -Persian Gulf hrawng i ramdang raltuknak lawng venhim dingin Israel Navy hna nih US le West ram hna he hmunkhat rianttuantinak an ngaihmi cu Iran nih a duh lo i, “Zionist regime a tel ve ahcun buainak fak le raldohnak tiangin Middle East ah a tlunter lai” tiin, Israel aa tel ding an duh lonak cu an chim ve.

Hi kong he pehtlaiin Australia tu nih cun Germany i hrawm ve loin, Britain ruahnak lak in US thazaang tthawnternak ding, Iran phihkharnak le hremnak hi puitlinh dingin US he hmunkhat rianttuannak ngaih dingin Australian PM Morris nih thanhnak a tuah ve.